Регионла эки жанлы хайырлы байламлыкъла тохташдыргъандыла

Къабарты-Малкъар Республиканы Башчысы Казбек Коковну Удмурт Республиканы Башчысы Александр Бречалов бла ишчи тюбешиулери къуралгъанды.  Аны чеклеринде сатыу алыу-экономика, илму-техника, маданият эм башха бёлюмледе байламлыкъланы тохташдырыу келишимге Къабарты-Малкъар Республиканы бла Удмурт Республиканы Правительстволары къол салгъандыла. Документде регионланы бирге ишлеулерини 20 ыздан артыгъы белгиленеди.

Удмуртия Приволжский федерал округну айныгъан промышленный-аграр регионуду, ол Урал экономика районну бир кесегиди. Республиканы промышленный предприятиялары  байламлыкълагъа (связьгъа) керекли затланы, радиоэлектроника, медицина техника, нефть-газ оборудование, темирден бла пластмассдан затла чыгъарадыла. Субъектде эл мюлк да магъаналы жерни алады: малла жайыу эм кёгет ёсдюрюу.

Регионланы хар жаны бла байламлыкълары регионну иели субъектлерини араларында рынок халларын игилендирирча болумланы къурараугъа себеплик этерикдиле. Удмуртияны бла Къабарты-Малкъарны предприятияларыны араларында биринчи ишчи байламлыкъла тохташдырылгъандыла, республикадан Удмуртиягъа кондитер эм сют, урлукъ продукция жибериледи. Бийик технология продукция чыгъаргъан предприятияланы байламлыкъ жюрютюрча онгларына къаралгъанды. Къабарты-Малкъарны жанындан сёз ол санда электроэнергетикагъа жарагъан бийик-вольтлу аппаратураны, тюрлю-тюрлю алмаз инструментлени, шёндюгюлю медицина цифралы рентген техниканы юсюнден барады.

Сёлешиуледе туризм бёлюмде байламлыкъланы юсюнден да айтхандыла – Нальчикни курортларында саулукъ кючлендириу эм тири солууну, бийик-тау болумлада спорт командаланы жарау жыйылыуларын къурауну юсюнден. Келишимде отлукъ-энергетика комплексни айныуу, энергия, аны аяулу жюрютуюге себеплик этген технологияланы жарашдырыу эм жашаугъа кийириу тема да белгиленеди. «Сёзсюз, сынамла бла шагъырейлениу эм экономиканы башха-башха бёлюмлери бла байламлы билим бериу программала да хайырлы боллукъдула», - дегенди Къабарты-Малкъарны Башчысы.

Жууукъ заманда Къабарты-Малкъар эм Удмурт республикаланы инвестиция проектлерини кёрюмдюлерини базаларын къурау иш бардырыллыкъды, ол санда импортну алышындырыу проектле жаны бла да. Регионну таматалары  Къабарты-Малкъарны эм Удмуртияны предприятиялары да къошулуп регионла аралы онлайн-бизнес-миссияны къурау эм бардырыу сорууну да сюзгендиле.