Тири болуу, башламчылыкъла этиу-жетишимликни мурдоруду

Черек районну Бабугент элинде экология жаны бла таза гара суула къуюлгъан «Babugent» завод ачылгъанлы бир ненча жыл толгъанды. Бу кезиуде предприятияны аты республикадан тышында кенг белгили болгъанды. Аны продукциясын Москвада. Санкт-Петербургда, башха шахарлада да кёрюрге боллукъду. Сёзге, «Babugent» сууну Москвада Dixis тюкен сетьлеге келгенле сюйюп алгъанларына кесим да шагъат болгъанма.

Шёндюгю оборудование бла жалчытылыннган предприятияда жангы ишчи жерле къуралгъандыла. Бу инвестиция проектге 200 миллион сомдан аслам къоратылгъанды. Завод ахыр онжыллыкълада элде ачылгъан биринчи предприятие болгъанын эсге алсакъ, бу иш бютюнда къууанчлыды. 

Аны учредительлеринден бири – заводну башчысы Аттасауланы Тахирди. Бу кюнледе уа ол республиканы экономикасын айнытыугъа салгъан къыйыны ючюн КъМР-ни Башчысыны Ыразылыгъы бла белгиленнгенин айтырчады. Ол бизге билдиргенича,  предприятияны мекямы бир жылгъа битдирилгенди, ол мурдорундан башлап, жангыдан ишленнгенди.   

Оборудованияны юсюнден айтханда, станокла Германиядан, Польшадан эмда Литвадан келтирилгендиле, ала бийик технологиялыдыла. «Биз формала сатып алгъанбыз,   пластик шешаланы  чыгъаргъан станогубуз барды»,-дейди ол.

Кертисин айтханда, бюгюнлюкде гара сууланы рыногу уллуду, тыш къыралладан келтирилген   башлап, кесибизде къуюлгъан тюрлю-тюрлю суула кёпдюле. Алай  «Babugent» не бла энчиди, аны адамла не ючюн сатып алыргъа боллукъдула деген соруугъа жууаплай, Аттасауланы Тахир  предприятие шауданны тийресинде ишленнгенин билдиргенди.  Сууну качествосуна уа озгъан ёмюрню 80-чи жылларында окъуна эс бурулуп, ол тинтилгенлей тургъанды.  «Шаудан сууну татыуу башхады, мен кесим да аны сюйюп ичеме. Бизни продукцияны бир кере кёрген, артда къайтып келеди.  Биринчиле болуп былайда суугъа французлу бизнесменле эс бургъан эдиле,  завод ишлетирге умутлары да болгъанды. Алай къырал чачылгъаны ол муратла юзюлгендиле»,-деп къошханды бизни ушакъ нёгерибиз.

Тахир айтханыча, Москва, Калининград, башха шахарла бла келишимле этилип, продукция ары элтиледи.  

Ишсизликни, къолайсызлыкъны, ышаныулукъ болмагъаныны хатасындан жаш адамла республикадан кетип баргъанлары уллу жарсыуладан бириди. Алай, бизни ушакъ нёгерибиз акъыл этгенича, тау элледе ма былай артыкъ уллу болмагъан предприятияла ишлетирге  неда файда келтирген башха иш бла кюреширге, алай бла уа баш кечиндирирге битеу онгла бардыла.

- Адамла власть жукъ да этмейди, болушмайды деп, тарыгъып турадыла, кеслери уа жерлеринден да тепмейдиле. Алай, сёз ючюн, биз бу заводну проектин хазырлагъаныбызда, документлени къурагъанда, мекямны ишлетгенде да районну администрациясы, Правительство да  уллу болушлукъ этгендиле,  тыйгъычлагъа, чырмаулагъа тюбемегенбиз. Республикада бизнесни айнытыугъа энчи эс бурулады деп шарт айталлыкъма. Жаланда сакълап турмай, тири болургъа, тёгерекге-башха къарап, ма бизде уа быллай иш къураргъа боллукъ эди деп, башламчылыкъла этерге керекди. Ишлерге сюйгеннге онгла табыладыла. Къырал даражада уа тюрлю-тюрлю программала бардыла, ала бла хайырланыргъа керекди,-дейди бизни ушакъ нёгерибиз.