Сабийлеге - магъаналы дерс

«Каббалкэнерго» компанияны ишчи жерде къоркъуусузлукъгъа юйретиучю Батчаланы Ирина, Нальчикде «Тейри къылыч» сабий реабилитация арада дерс бардыргъанды. Анда ол сабийлеге электрокючню къоркъуусузлу хайырланыуну жорукъларын ангылатханды, дегендиле компанияда.

Батчаланы Ирина шахарны электросетьлеринде урунууну къоруулау бёлюмюню башчысы болуп ишлейди. Кеси да алгъаракълада «Россети» компанияны энергетика институтунда юч айны окъуп къайтханды. Ол анда ишде «Vision Zero» производстволу концепцияны сингдириуню чеклеринде билим алгъанды.

Компанияда айтханларына кёре, бу концепция, ишлеген жерлеринде адамлагъа жетерге боллукъ хатаны азайтыр хыйсап бла жарашдырылгъанды. Бу специалист а, аны кёп затларын ол дерсинде да хайырланнганды.

«Шёндюгю дунияда сабийле окъууда, ойнауда да къадар тюрлю электрон устройстволаны хайырланадыла. Ала кёп затланы биледиле, сейирлери да уллуду. Ала бла профессионал тилде ушакъ бардырыргъа боллукъду», - дейди энергетик.

Ол халда бардырылгъан дерс керти да сейир болгъанды; анга бёлюннген эки сагъат къалай ётгени окъуна сезилмегенди. Къонакъла сабийле бла бир тилде сёлеше, электрокюч ургъандан адам кесин къалай сакъларгъа боллугъун, юзюлюп жерге тюшген ток чыбыкъ нечик уллу къоркъуу келтиргенин, энергообъектлени къатларында орналгъан белгиле нени юсюнден билдиргенлерин ангылатхандыла.

Компанияны специалистлери бардыргъан быллай дерслеге жыл сайын юч мингден артыкъ сабий къатышады. Алада берилген билим аланы саулукъларын, жашауларын сакъларгъа болушады.