Осетинли суратчы Жангоразланы Ахыя хажини суратын ишлегенди

Шимал Осетиядан художник Вадим Каджаев бу кюнледе Малкъарда белгили дин къуллукъчу Жангоразланы  Ахыя хажини суратын ишлеп бошап, аны халкъгъа баям этгенди. Аны быллай чыгъармагъа Кавказда муслийман идараны арасында белгили дин къуллукъчуну къадары, жашаууну ахыр кюнлерини, аны ёлюгюне этилген зорлукъну хапары кёллендиргенди.  

Белгилисича, 1930 жылда Кавказда большевиклеге къажау къазауат башланнганды. Чиколада (ол кезиуде аны аты Магометановское болгъанды) анга  Хаздимет Медоев башчылыкъ этгенди. Бу эл Малкъаргъа жууукъда орналыпды, кеси да ол кезиуде эм уллу элледен бири болгъанды – анда 7 мингден аслам адам жашагъанды.

Медоев Черек ауузда большевиклеге къажау тургъанла бла, аланы таматалары Ацкъанланы Нухтар-Паша бла къаты байламлыкъла жюрютгенди. Жангоразланы Ахыя  да, жыл  санына къарамай, аны къауумуна къошулгъанды. Нухтар-Паша аны киеую болгъанын сагъыныргъа тийишлиди.

Къызыл аскерчиле Чиколада бла Алагирде къанлы къазауат бардырып, властьха къажау тургъанланы чачхандыла, кёплени ёлтюргендиле. Сау  къалгъанла уа, къачып, Нухтар-Пашаны къауумуна къошулгъандыла.   Муслийманла,  аскерледен бугъун, кёп айлана келип, таулада Алмалы Догъуат деген жерде орналгъандыла.

Бир жол эрттенликде Ахыя хажи нёгерлери бла бирге, намазгъа къобуп, абидез ала болгъандыла. Намазгъа тургъанлай, бир тауушла эшитилип тебирейдиле. Абирекледен бири чакъырылмагъан «къонакълагъа» ушкокдан атып башлайды. Аскерчиле анга жууапха от ачадыла. Алайда къанлы сермеш башланнганында да, Ахыя хажи намазын къоймагъанды. Атышыу бошалгъанда аскерчиле  хажини къатына барып, аны  сау болгъанын кёредиле, алайда аны мангылайына атып ёлтюредиле.

Жангораз улугъа сынатылгъан  зорлукъ алайда бошалмайды. Аны ёлюгюн къызыл аскерчиле энтта кёп къыйнагъандыла, ахырында уа кешенеге атып къойгъандыла. Бу артыкълыкъланы кёрюп тургъан  абирек  Хадзимет Медоевни кичи къарындашына айтханды. Ол а бу хапарны кесини дневнигинде жазып сакълагъанды. Ма бу ачыулу хапар кёллендиргенди Вадим Каджаевни таулу  абирекни суратын ишлетирге.