Эл мюлкде уруннганланы ышаннгылы таянчагъы

Газетни корреспондентине Къабарты-Малкъар Республикада Россельхозбанкны бёлюмюню таматасы Алим Сокуров билдиргеннге кёре, арт жыллада финанс учреждение регионда бир ненча инвестиция проектни жашауда бардырыргъа себеплик этгенди. Сёз терек бахчачылыкъны бла тахта кёгетлени ёсдюрюуню юсюнден барады. 

Республикада, 2019 жылда декабрьден тебиреп, 123 гектарда тирликни терк берген терек бахчаланы салыу бла уллу инвестициялы проект хайырланады.  Аны чекленнген иелиги болгъан «Сады Нальчика» биригиу ишлеп башлагъанды.  Толусунлай проектни багъасы 492 миллион сомду, ол санда банк ёнкючге 368, 5 миллион сом бергенди.  Сагъынылгъан проект жашауда толусунлай бардырылып тебиресе, алмала ёсдюрюую бла республика ич регион продуктун кёбейтирикди. Ал этилген тергеулеге кёре, бир жылгъа къошакъ халда 7 минг тонна хазыр продукция чыгъарыллыкъды.

Жетишимли ишлеген эм Россельхозбанк бла байламлыкъны тийишлисича жюрютген предприятияладан бирине «Фрукт-Трейд» биригиу саналады. Бу биригиуде шёндюгюлю излемлеге келишген кёгетлени сакълагъан, тазалагъан эм жарашдыргъан жерле бардыла.  Банк ёнкючге берген ахчагъа алмаланы качестволарын тас этмей, 270 кюнню сакъларча шёндюгюлю оборудование сатып аллыннганды. Ол амалны хайырындан уллу тюкенледе сатылгъан кёгетлени эм иги качестволу продуктланы тизмесине къошаргъа боллукъду. Андан сора биригиуде алмаланы сыгъып, татлы суусапла эм къатханла этедиле. Ала къыралны башха регионларында окъуна сатыладыла. Битеу продукция тюкенлеге тап жарашдырылып, алай ашырылады. 

Нальчикни консерва заводу кеси ёсдюрген продукцияны - жашил къудоруну, тюрлю-тюрлю томатланы, нашаланы эм тахта кёгетлени жарашдырып, анда орнатылгъан оборудованияда консервалагъа салады. Сёз ючюн заводда чыгъарылгъан жашил къудору качествосу бла «Бондюэль» эм «Жашил великан» аты болгъан продукциягъа оздурмайды. Ариу жарашдырылгъан продуктла Краснодар крайда, Ростов областьда, Кърымда, Москвада сатылынадыла. Сёз ючюн, буруннгу жыл, ол биригиу 280 миллион сом багъасы 7 миллион консерва банка чыгъаргъанды.         

«Россельхозбанк республиканы эл мюлкюне тохтаусуз ёнкючлени бёлгенлей турады, кезиулю сабан ишлени бардырыргъа керекли затланы алыргъа себеплик этеди, финанс жаны бла, ол санда ёнкючлени 5 процентден кёп болмай береди. Финанс учрежденияны филиалы Къабарты-Малкъар Республикада ишлеп тебирегенли аны экономикасына 51 миллиард сомдан аслам салгъанды», - деп белгилегенди А. Сокуров.

Бизни корр.
Поделиться: