«Вольфрамны бла молибденни кесибизде чыгъарыу - импортну алышындырыуну бир кесегиди»

Россейни экономиканы айнытыу министри Максим Решетников, Къабарты-Малкъарны Башчысы Казбек Коков, «Кавказ.РФ» корпорацияны баш директору Хасан Тимижев эмда «Ростех» ГК-ны келечилери Тырныауузда жер тюбюнде хайырлы металланы чыгъарып башлауну онгларын сюзгендиле.

Максим Решетников бу проектге РФ-ни Правительствосуну жанындан не бла себеплик этиллигин билдиргенди. «Къураллыкъ предприятие регионла аралы магъаналы боллугъун эсге алсакъ, проектни битеу Шимал-Кавказ федерал округну айнытыугъа да хайыры тиерикди. Аны инфраструктурасын къураугъа 2 миллиард сом бёлюннгенди. Ол ахчагъа тамамланыллыкъ жумушлагъа комбинатха элтген жолну 6,2 километрин жангыртыу ишле да киредиле. Проект дагъыда Невинномысск шахарны айнытыргъа да себеплик этерикди», -деп белгилегенди министр.

«Проектни «Ростех» къырал корпорациягъа кирген «Эльбрусметалл» акционер общество бардырады. Магъаданны къазыу эм жарашдырыу бла уа Тырныаууздагъы тау-байыкъландырыучу комбинат кюреширикди. Комбинатны  концентратлары уа Невиномысскдагъы гидрометаллургия заводда жарашдырыллыкъдыла. 
Капитал салымланы ёлчеми 55 миллиард сомгъа жетеди, эки предприятияда да 900 ишчи жер къураллыкъды», - деп билдиргендиле Ростехде.

«Бусагъатда РФ-ни Правительствосунда вольфрамны бла молибденни аз тюбеген металланы тизмесине къошууну юсюнден сёлешине турады. Ол а налог ауурлукъну азайтыр ючюн керекди.  Алай этилсе, проектни къыйматы кёбейирикди, дагъыда, жангы жерлени къазаргъа тюшгенде, жер тюбюнде байлыкъланы хайырланыу ючюн бир кере тёленнген ахчаны ёлчемин да азайтыргъа онг чыгъарыкъды.  Бюгюнлюкде вольфрам Приморье, Забайкал, Хабаровск крайлада эмда Бурятия Республикада,  молибден а  Хакасияда бла Забайкал крайда чыгъарыладыла», -деп чертгенди Максим Решетников предприятияда болгъанында.  

«Тырныауузда вольфрам-молибден магъаданланы къазып башлауну планы Россейни Президенти Владимир Путинни буйругъуна кёре толтурулады. Ол Къабарты-Малкъарда бек уллу предприятие боллукъду, кеси да къошакъ халда жюзле бла ишчи жерле къураргъа онг берликди, бюджетге да иги кесек ахча тюшюртюрюкдю. Бу проект дагъыда республиканы алгъа уллу атлам этдирлик проектлени РФ-ни Правительствосу къабыл кёрген тизмесине киреди. Биз ол инвестициялы проектни жашауда бардырыугъа себеплик этер ючюн къолубуздан келгенни аямайбыз», – дегенди Казбек Коков.

Бюгюнлюкде бир-бир объектлеге кёре проект-излеу ишле бардырыладыла, бир къауумуна кёре уа къурулуш  башланнганды. Биринчи производствону 2023 жылны аягъында, 2024 жылны башында башларгъа белгиленеди.  ВЭБ.РФ-ни финансла партнерча къатышыууну амалларына да къарала турады.

РФ-ни Правительствосуну Председатели Михаил Мишустинни буйругъу бла предприятиягъа къыралны жанындан себеплик этиуню онгларына, ол санда жер тюбюнде байлыкъланы къазыугъа салыннган налогну азайтыуну онгларына къарала турады. Ол мадар экономика санкцияланы кезиуюнде Россейни экономикасын айнытыуну жалчытыу жаны бла бек биринчи тамамланыллыкъ ишлени планына киргенди эмда 2025 жылгъа дери сакъланырыкъды.

«Вольфрамны бла молибденни кесибизде чыгъарыу импортну алышындырыу жаны бла борчну толтурууда уллу магъананы тутады. Вольфрам бла молибден – аз тюбеген кючлю металладыла. Ала  металлургияда, автомобильле, самолётла ишлеуде, нефтьни жарашдырыуда, къорууланыу промышленностьда да хайырланыладыла. Биз россейли рынокну вольфрамы болгъан сырьё бла толусунлай жалчытырбыз деп, бек ышанабыз», - дегенди Ростехни келечиси.

Металланы экиси да дуния эмда ата журтлу рыноклада артыкъда кёп суралгъан эмда багъа тургъан сырьё болгъанлай къаладыла.