Предпринимательле бла ачыкъ халда сёлешгендиле

Къабарты-Малкъар Республикада ишлеген предпринимательле кризисге къажау жарашдырылгъан программала бла ёнкюч ахча алыргъа боллукъдула.

 КъМР-ни Экономиканы айнытыу министерствосу Гитче эм орталыкъ предпринимательликни айнытыу (МСП) корпорациясы бла бирге Нальчикде предпринимательлени жыйып тюбешиу бардыргъанды.  Анга  МСП корпорацияны башчысыны тамата кенгешчиси Виталий Машков, МСП Банкны правленини председателини орунбасары Арсан Демельханов, СКФО-да РФ-ни Президентини толу эркинликли келечисини департаментини кенгешчиси  Иса Дадагов,   КъМР-ни Правительствосуну Председателини орунбасары Муаед Кунижев,  КъМР-ни экономиканы айнытыу министри   Рахайланы Борис, республикада предпринимательлеге себеплик этген институтланы оноучулары, жамауат биригиулени келечилери эм сатыу-алыу иш бла кюрешгенле къатышхандыла.

Жыйылыугъа къатышханлагъа алгъыш сёзюнде Муаед Кунижев былай айтханды: «Биз МСП корпорация бла МСП Банк республикагъа этген болушлукъну ангылайбыз, сау болсунла. Бюгюн да былайда жыйылып, магъаналы сорууланы сюзерге онг болгъаны гитче эм орталыкъ бизнесни айнытыргъа себеплик этерикди, артыкъда санкцияланы кезиуюнде. Къабарты-Малкъар Республиканы Правительствосу бла МСП корпорация гитче эм орталыкъ предприниматель ишни айнытыу бла байламлы 2016 жылда келишим этгендиле.

Регионда кризисге къажау жарашдырылгъан программалагъа ёнкюч ахчаны алабыз деген адамгъа залогга берир ырысхы жетмесе, МСП корпорация ышаннгылы къагъыт берирге боллукъду, - дегенди Виталий Машков.

Бюгюнлюкде ёнкюч ахчаны алыргъа кризисге къажау юч программа ишлейди. МСП корпорация эм Ара банк «ПСК «Инвестиционная» программаланы жашауда бардырадыла. Гитче эм орталыкъ бизнес  «ПСК «Оборотная» программа бла хайырланыргъа боллукъдула, ол ишге себепликни РФ-ни Ара банкы этерикди. Андан сора предпринимательле ахча болушлукъну РФ-ни Экономиканы айнытыу министерствосуну 1764-чю номерли бегимине тийишлиликде финанс болушлукъну алыргъа боллукъдула. Ахчаны берген банкланы тизмеси министерствону официальный сайтында басмаланыпды, деп билдиреди КъМР-ни Экономиканы айнытыу министерствосуну пресс-службасы.