Тышына кетерге сюймегенди этген оноууна сокъуранмагъанды

Умутландыргъан гёжеф Шауаланы Малик  эркин тутушууда жетишимлери бла белгилиди. 

 

Спорт бла Малик 12 жылдан асламны кюрешеди, залгъа аны эм алгъа тамата къарындашы келтирген эди, артда уа кеси да жаратханды. Жарау этип Малик он жылында тренерле Чапайланы 

Аликде бла Ажоланы Асадуллахда башлагъанды. Россейни Спорт министерствосуну буйругъу бла 2020 жылны 27 февралында анга спортну устасы деген ат берилгенди.    

 

Маликни эм уллу жетишимлеринден бири Россейни чемпионатында алтын майдалыды. Анда гёжеф, 79 килограммгъа дери ауурлукъ къауумда тутуша, финалда Дагъыстанны келечиси Ахмед 

Усмановдан кючлю болуп, биринчи жерни алгъанды. Чемпионатны юсюнден айта, Малик анда тёрт  тюбешиу бардыргъанын, аладан экисин болжалдан алгъа хорлам бла бошагъанын 

билдиргенди. Хар спортчуча, ол да эришиуню аллында кесин хорламгъа кёллендиреди. Гёжеф тренерини, кесини да къыйыныны багъасын чыгъарыргъа борчлуду, дейди. 

 

Шауа улу дагъыда кёп даражалы эришиуде да атын айтдыргъанды. Москвада бардырылгъан «Поддубныйни гёжеф лигасы» деген халкъла аралы турнир да аланы къауумундады. Андан да таулу жаш биринчи жер бла къайтханды. Алгъаракълада Красноярск шахарда эркин тутушуудан «Иван Ярыгинни» XXXII гран-прийи бардырылгъанды. Даражалы халкъла аралы турнирге, тёреде бола келгенича, эм кючлю гёжефле къатышыучудула, хорлам ючюн тюбешиуле да, анга кёре, сейир ётюучюдюле.  Анда Малик экинчи жерге чыкъгъанды. Ол, юч сермешинде хорлап, ахырында 2021 жылда дунияны чемпионатыны доммакъ призёру Радик Валиевге 1:3 эсеп бла къытдыргъанды. Воронежде эркин тутушуудан эр кишилени араларында Ара федерал округну чемпионаты болгъанды. Анда да Москва областьны командасыны санында эрише, Малик биринчи жерни ычхындырмагъанды. 

 

Бурятияны ара шахары Улан-Удэде эркин тутушуудан Россейни  Олимпиаданы аллында чемпионаты бардырылгъанды. Бу магъаналы айырыу стартда да «алтынны» Шауаланы Малик келтиргенди. Ол, 79 килограммгъа дери ауурлукъ къауумда тутуша, финалда Дагъыстанны келечиси Ахмед Усмановдан кючлю болуп, биринчи жерни алгъанды.  Бу эришиуню юсюнден айта, гёжеф чемпионатда алгъан «алтыны» анга эм багъалы саугъаладан бири болгъанын белгилегенди. «Абадан къауумда къырал даражалы эришиуге ючюнчю кере къатышама. Биринчи тюбешиуюмде былтыргъы финалистни хорлагъанма. Аны къытхан эсем, кезиулю тюбешиулеге башхаланы да онгларма деген акъыл бла чыкъгъанма», - дегенди ол. 

Жетишимли спортчугъа тыш къырал ючюн тутушургъа чакъырыу да келгенди. Алай тренери айтханнга тынгылап, ол мында къалгъанды эм бу оноууна сокъуранмагъанын да белгилегенди.