Уллу кёллюлюк игиге келтирмез

Жай жылыула келгени бла адамла заманларын суу боюнунда, кёлледе да ётдюредиле. Алай быллай солуу зауукълукъдан сора, къоркъуу да келтирирге боллукъду. Сёз мында ол тийреледе электрокюч ызла тартылып тургъанда къоркъууну юсюнден барады, дейдиле «Каббалкэнергода».

Энергетикле билдиргенлерича, бийик вольтлу ток ызлагъа жууукъ барыргъа чыртда жарамайды. Сёз ючюн, кючю бир киловольтха жетмеген ызланы неда энергетика объектлени тёгереклеринде къоркъуусузлукъ тийрелери эки метр бла чекленеди. Ток 6-10 кВ бола эсе, анга – 10, 35 кВ – 15, 11 кВ эсе уа – жыйырма метрден жууукъ барыргъа жарамайды. Алайлада чыпынлагъа ёрлерге, кёлледе чабакъ тутаргъа жарамагъанын ангылатхан эсгертиу белгиле орнатыладыла. Бу затлагъа уллу кёллюлюкню ахыры бек осал боллукъду.

Къысхасы, ток ызла неда электрокюч объектле болгъан жерлеге жууукъ барып ойнаргъа, кёлледе жууунургъа, чабакъ тутаргъа, ызлагъа абери тагъаргъа  жарамайды. Аны юсюнден тамата тёлю, сабийле да билирге шарт керекдиле.

Энергетикле дагъыда кёк кюкюрегенде чабакъ тутаргъа жарамагъанын да эсгертедиле. Кюнню халы  тюрленип, булутла да жууукъдан жууукъ келип башласала, чабакъ тутууну олсагъат къоюп, кёлден не къадар узакъгъа кетерге керекди. Белгилисича,суу токну болмагъанча  иги ётдюреди. Элия кёлге урса, ток аны жагъасындан жер бла энтта да жюз метр тёгерекге жайылады. Бирледе уа элия суугъа угъай, кёлню къатында жерге да урургъа болады. Аны ючюн,  айтылгъаныча, ол тийреден терк къутулургъа керекди.

 Бузукълукъ этилгенни неда жарсыулу иш болгъанын эслесегиз, «Россети Шимал Кавказ» компанияны 800-220-0-220 деген сау кюнню ишлеген телефон номери бла сёлешип билдиригиз.

Сагъынылгъан тийрелеге кирирге жарамагъаныны юсюнден РФ-ни Правительствосуну 2009 жылда 24 февральдан 160 номерли бегими бла тохташдырылгъан жорукъла бардыла. Аланы сансыз этгенлени хаталарындан ток бла жалчытыу тыйылса – алагъа тазир салынырыкъды. Аны ёлчеми гражданлагъа – 5-10, къуллукъчулагъа – 10-20, предприятиялагъа бла организациялагъа уа – 100-200 МРОТ тенгли боллукъду. Дагъыда сюд оноу этсе, ала салгъан хатаны багъасы тергелип, аны да тёлерге тюшерикди.

 

 

Улбашланы Мурат хазырлагъанды.
Поделиться: