Табийгъатны тапландырыуда-жангы амалла

  КъМКъАУ-ну «Къурулуш эм жерлени жарашдырыу» эмда «Механизация эм предприятияланы энергия бла жалчытыу» факультетлеринде «Къурулушда, табийгъатны тапландырыуда, эл мюлк производствону механизациясында инновациялы оноула» деген Битеуросей илму-сынам конференция бардырылгъанды. Аны ишине КъМР-ни Табийгъат байлыкъла эмда экология министерствосуну, «Каббалкмелиоводхоз» къырал учрежденияны келечилери, аспирантла, магистрле, студентле эм башхала къатышхандыла, деп билдиргендиле вуздан.

  Конференцияны иши очно-заочный халда баргъанды. Кеси да алты кесекден къуралгъанды. Биринчисинде кадастрны, жерлени эмда табийгъатны тап хайырланыуну, экинчисинде уа инвестицияланы, къурулушну, эл тийрелени айнытыуда жеринден тепдирилмеген мюлк къаллай магъана тутханыны юсюнден сёлешгендиле. АПК-да предприятияланы эмда эл тийрелени энергетикасы, жангы технологияла, сора дагъыда эл мюлкню механизациясын илму жаны бла жалчытыу, АПК-да механикада техникалы борчла – ючюнчю эм тёртюнчю секцияланы темалары болгъандыла. Ызы бла алимле, къонакъла эмда студентле агропромышленность комплексде продукция чыгъарыуда хайырланылыргъа боллукъ ресурсланы аягъан технологияланы юсюнден сёлешгендиле.

  «Каббалкгипроводхозну» башчысы Базаланы Рамазан бизни республикада черек жагъаланы къоруулауда болгъан амалла бла шагъырейлендиргенди. Вузну «Жерлени жарашдырыу эмда жеринден тепдирилмеген мюлкню экспертизасы» кафедраны башчысы Созайланы Ахмед а Бахсан сууну жагъасын эмда Тырныауузну къоруулагъан аллай объектлени реконструкциясыны юсюнден хапарлагъанды. Башха докладланы чеклеринде этанолну отлукъ халда хайырланыргъа боллугъуну, эл мюлк жерлени тап жарашдырыуну юсюнден информация берилгенди.

 Конференцияны пленар кенгешинде алимле бир-бирлени оюмлары бла шагъырейленнгендиле. Созайланы Ахмед жыйылыуну къыйматлыгъын, анда кёргюзтюлген илму материалла да магъаналы болгъанларын чертгенди. 

 

 

Улбашланы Мурат хазырлагъанды.
Поделиться: