Талпыныулукъгъа тыйгъыч жокъду

Москвада саулукъларында къыяулары болгъанланы профессионал усталыкъларыны "Абилимпикс" деген 1V миллет чемпионаты бардырылгъанды. Анга тюрлю-тюрлю регионларындан бир минг бла 500 адам  къатышханды. Ма ала  талпыныулукъгъа тыйгъыч болмагъанын энтта да бир кере кёргюзтгендиле. 
 Къабарты-Малкъардан  ары Нальчикде гуманитар-техника колледжде  сентябрь  айда бардырылгъан  республикалы конкурсда хорлагъанла баргъандыла. Жаш адамла экономика эмда бухгалтер эсеп, медицина эм социал жумушла тамамлау,  къурулуш,   кийим тигиу эм бичиу, автомобильлеге ремонт этиу эмда  робототехника, сетевой эм системалы администрирование,  дюгер хычинлени этиу  деген эришиулеге къатышхандыла.
Шабат кюн  командабыз Нальчикге  къайтханды. Ол бу жол да къурлай келмегенди.  Конкурсда  Элбрус районда    аш этиу-кондитер регион колледжни  окъуучусу  Жашууланы Виктория,  дюгер хычинлени уста хазырлап,  экинчи жерге тийишли болгъанды эмда кюмюш майдал алгъанды. Викторияны  юйретиучюсю Мурачаланы Лейляды. 
        Конкурсну къурагъанла ол бошалгъандан  сора жашланы  бла къызланы   ара шахарны айбат жерлерине, ол санда  Къызыл Майданнга, ЦУМ-гъа, талай музейге  да элтгендиле, саугъала да бергендиле.