Милицияны подполковниги

Заман дегенинг алай терк барады, бирде айла бир ыйыкъча ётедиле. Хар кезиуню уа кеси жигитлери: урунууда, башха бёлюмледе алчыла. Заман озгъанлыкъгъа, аланы  ахшы ишлери уа эсден кетмейдиле.

Бу хапарымы жигити аллай адамладан бириди. Ол, алгъын Нальчикде Ленин атлы РОВД-да  къырал автоинспекциягъа башчылыкъ этип тургъан, Жекеланы Гыттыуну жашы Мухаммадияды.

ГАИ-ни таматасыны къуллугъу тынч иш тюйюл эди. Жыл сайын угъай, айдан-айгъа машиналаны санына къошула барады. Жолда жюрюуню къоркъуусузлугъун сакълаугъа дайым уллу эс буруп турмай жарамайды.

Таза жюрекден ишге берилмесенг, андан хайыр боллукъ тюйюлдю. Мухаммадия да аллай адамладанды. Буюрулгъан жумушну тийишлисича толтургъунчу тынчаймагъанды. Аны ол  халын билгенле анга хар заманда хурмет этгендиле.

Баш жигитибизни жашау жолуну юсюнден къысха айтханда, ол 1939 жылда Хасания элде туугъанды. Кёп турмай а уруш башланады да, атасы Гыттыу къазауатха кетеди. 1944 жылда январьда къызыу сермешлени биринде жигитча ёлген хапары келеди. Жууукъ-ахлу бушуу-бушман болады. Алай анга не этгин,  мадар жокъ.

Къыйынлыкъ аны бла бошалып къалмады. Дагъыда эки айдан халкъгъа кёчгюнчюлюк сынаргъа тюшдю. «Ол жыл эсимдеди. Бизни юйге солдатла киредиле да, анабызгъа буйрукъ  халда бир затла айтадыла. Сора хапчукларыбызны машинагъа жюклейдиле. Андан темир жол вокзалгъа келтирип, вагонлагъа миндиредиле. Он кюнден сора жетебиз барлыкъ жерибизге»,-деп эсгереди Мухаммадия сабийлигинде кёргенин.

Была Къыргъызстанны Ош областыны «Къызыл Аскер» колхозуна тюшедиле. Азиядан  къайтыр жылны аллында жаш он классны тауусады. Билимин  андан ары ёсдюрюрге таукел болуп, комендатурадан эркинлик алмай, Фрунзеге барады. Анда медицина  институтха киреди.

Юч ай окъугъанлай, кёчгюнчю болгъанын билип, ызына къайтарадыла. Не этерик эди, башха амал жокъ.  Колхозда сабанчы бригадада эсепчи болуп ишлеп тебирейди. 1957 жылда халкъы бла бирге журтуна келеди.

Ал жыллада  Жеке улу  блокла чыгъаргъан заводда урунуп тебирейди. Бираздан а Саулукъ сакълау  министерствону къурулуш-ремонт управлениясына шофёр болуп киреди. Аз-аздан ата юйюню жеринде жангы журтла да сюейди.

1962 жылда кюз артында уа аны Совет Аскерге къуллукъ этерге чакъырадыла. Анда да шофёр болуп турады. Андан сора  автоподразделенияны бёлюмюню  командирине саладыла. Къуллугъун тийишли тамамлагъаны ючюн командованияны жанындан кёп махтау да  бериледи таулу жашха.

Къыралны аллында сыйлы борчун бет жарыкълы тамамлап къайтхандан сора уа  алгъыннгы ишинде тохтайды. Бир кесекден а Нальчикде шахар военкомат аны милицияда къуллукъ этерге жибереди. Ол а уллу ышаныулукъну белгиси эди.

Мухаммадия жангы жерде патруль службада инспектор болады. Эки жылны уа КъМАССР-ни МВД-сында жууаплы дежурныйни борчун толтургъанды. 1970 жылда аны республикалы ГАИ-ни регистрация-экзамен бёлюмюнде тамата къырал инспекторну къуллугъуна саладыла. Бу ишде да ол кесин иги жаны бла кёргюзтюп, нёгерлерини, таматаланы да араларында даражасы, сыйы жюрюйдю.

Жаш заманындан  бийик билим алыр акъыл этген эди да, ол муратын жашауда болдура, Къабарты-Малкъар къырал университетни тарых факультетине киреди. Аны да жетишимли бошап, КъМАМИ-ни эл мюлк механизациялау факультетин тауусуп, экинчи дипломун да алады.

Ич ишлени органларында къуллукъ этген жыллада Жекеланы Мухаммадия не жаны бла да низамлы, ишин уста билген эм ахшы къурау хунери болгъан къуллукъчуча танытханды кесин. Ол башчылыкъ этген коллектив хар заманда ал сатырда баргъанды. Жеке улугъа бийик офицер чын да берилгенди. Ол милицияны подполковнигиди.

Кёп къырал саугъалагъа, махтаулагъа да тийишли болгъанды. Юй бийчеси Текуланы Зухура бла юч къыз ёсдюргендиле. Ала да бирер жерде юйюрле къурап жашайдыла. Мухаммадия уа ишни къойгъанды, пенсиячыды. Сабийлеге,  туудукълагъа къууана жашайды.

Османланы Хыйса.
Поделиться: