Балаланы Хас-Магометде - «алтын»

Коми Республиканы Сыктывкар шахарында Россейни ауур атлетикадан 23 жыллары толмагъан гёжефлени араларында биринчилиги бардырылгъанды. Алгъаракълада билдиргенибизча, анда Гюлюйланы Тамерлан (73кг.), битеу да 285 килограммны кётюрюп, доммакъ майдалны алгъан эди.

Эришиуню къалгъан кюнлеринде бизни республикадан дагъыда эки спортчу жетишимли болгъандыла. 109 килограмм ауурлукъ къауумда алтын майдалны Балаланы Хас-Магомет къытханды, аны тренер Жаппуланы Магомет юйретеди. Хас-Магомет эки упражненияда 385 килограммны кётюргенди, тартып – 175, тюртюп да – 210. Биринчликде эм иги кёрюмдю бизни гёжефде болгъанын белгилерге тийишлиди. 

Кюмюш майдалны Тимур Мариев (109кг.) алгъанды, Тимур битеу да 375 килограммны кётюргенди (168+207). Аны тренер Михаил Шикемов хазырлагъанды.

 

Анатолий ТЕМИРОВ.
Поделиться: