Хакъсыз процедуралагъа барып, борчлу болмазча

Бир ауукъ заман мындан алгъа: «Косметикабызны кёргюзтюрге сюебиз, косметологубуз теригизни тинтип, сизге жараулусун сайларгъа болушурукъду, ол хакъсызды, жангызда биргегизге паспортугъузну ала келигиз», - деп сёлешедиле. Номерими къайдан тапхансыз деген сорууума, тенгигиз берген болур деп, шарт жууап къайтаралмайдыла. Хакъсыз процедура ючюн паспорт нек керек болгъанын да айтмайдыла. Бармайма.  Артда билеме, ол багъасы 50-80 минг эм андан кёп тургъан косметиканы рекламасы болгъанын.

Бу кюнледе уа Роспотребнадзорну регионда управлениясыны официал сайтында быллай фирмаланы юслеринден ангылатыу статьясы чыкъгъанды. Адамла аллай жерлеге болумну билип барыр ючюн, аны газетде басмалауну дурус кёргенбиз.

Статьяда белгиленнгенича, арт жыллада бек багъалы косметиканы эм косметология жумушланы рекламасы къыстау барады. Жамауатда кеслерине сейирни къозгъар муратда ала адамланы хакъсыз процедуралагъа чакъырадыла. Керти умутлары уа, артда кёп мингле тургъан косметиканы сатаргъа неда косметология жумушланы этерча келишимле тауусургъады. Асламысында аланы багъалары асыры уллудан, тёлерге кёплени къолундан келмейди. Алай эсе да, мажарыулу специалистле олсагъатлай бу сейирлик косметикаларын кредитге алыргъа жарарыгъын билдиредиле, ахчаны борчха салондан чыкъмай алыргъа боллугъун, аны ючюн процентле къошулмазлыкъларын да чертип айтадыла. Паспорт да ма аны ючюн керекди. Документлеге къол салгъаны бла уа инсан косметиканы сатхан фирма эм кредит организация (банк) бла да келишимни тауусады, алай бла борчлу болады - кредитни, процентлени да тёлерге тюшеди.

Эсигизде болсун: хайырланыучу косметиканы сатыу-алыуну юсюнден келишимлени тауусханда, аны жангызда товарны качествосу осал эсе бузаргъа онг барды. Россейни Правительствосуну 2463-чю номерли бегимине тийишлиликде, качествосунда шарайыбы болмагъан парфюмер-косметика товар алышыргъа неда къайтарыргъа жарамагъан продукцияны къауумуна киреди.  

Аны бла байламлы багъалы косметиканы кредитге алырдан алгъа ол сизге кертиси бла да керекмиди, артда аны ючюн кредитни тёлеу къыйын кёрюнмезми - иги сагъыш этигиз. Сатыучула, тёгерегигизден алып, продукцияларын махтагъанлыкъгъа, къол салыргъа ашыкъмагъыз, документлени тынгылы окъугъуз. Сора, сатылгъан косметика сизде аллергияны къозгъарына бла къаллыгъына, излемлеге келишгенине да эс буругъуз. Унутмагъыз: бир кишини да сизге зор бла келишимни тауусдурургъа эркинлиги жокъду. 

 

 

Кульчаланы Зульфия хазырлагъанды.
Поделиться: