Электрокючге уллу кёллю болмазча

Элбрус районда электрокюч сетьлени келечилери Тырныауузда ючюнчю номерли орта школну окъуучулары бла тюбешгендиле. Аны кезиуюнде энергетикле алагъа токну, аны магъанасыны, къоркъуулу болгъаныны юсюнден кёп хапар айтхандыла. Электрокюч бла ишлеген бытовой приборланы къалай хайырланыргъа боллугъун, энергетика объектлени къатларына жууукълашыргъа жарамагъанын да туура этгендиле.

Ызы бла викторина бардырып, сабийлени арасында электрокючню къоркъуусузлугъуну жорукъларын къайсылары толуракъ билгенлерин да ачыкълагъандыла. Башхаладан эсе игирек къатышханла, тюз жууапла бергенле, кеслерини сынамларын айтханла да болгъандыла.

«Россети Шимал Кавказ» компанияны регионда бёлюмюнден билдиргенлерича, бу тюбешиуню ала  Сабийлени къоруулауну халкъла аралы кюнюне атап бардыргъандыла. Ол кюн къонакъла школчуланы барына да саугъала бергендиле, иги билим кёргюзтгенлени уа грамотала бла белгилегендиле.

Эсге сала айтсакъ, электрокючню къоркъуусузлугъуну юсюнден дерслеге жыл сайын бизни республикада юч мингден артыкъ сабий къатышады. Энергетикле быллай тюбешиулени школлада, жай солуу лагерьледе да бардырыучудула.