Поликлиника жангы излемлеге келиширикди

Бюгюнлюкде «Саулукъ сакълау» миллет проектни чеклеринде «Саулукъ сакълауну биринчи звеносун жангыртыу» регион программагъа кёре, федерал бюджетден Чегем районну  ара больницасын жангыртыргъа  14,9 миллион  сом  бёлюннгенди.

Анга  1980 жылдан бери тынгылы ремонт этилмегени ючюн тозурап башлагъан эди эм жангы излемлеге да келишмегенди. Стационарны баш врачы Елена Кокова айтханнга кёре, пациентле къыйналмазча эм специалистлени да ишлерине чырмау чыкъмазча ремонтну тынч-тынч бардырыргъа тюшгенди. Аны бла байламлы тийишли жумушланы   ючюнчю этаждан башлагъандыла.  Бир- бир кабинетлени башха корпуслагъа кёчюрюрге да тюшгенди. 

 Бусагъатда корпусда  юй башыны къанжалларын, терезелерин, эшиклерин, коммуникацияларын, жылытхан,  хауа жюрюген системаларын, полларын алышып бошагъандыла. Ич эм тыш къабыргъаларын да  жангыртхандыла.  Къоркъуусузлукъ жалчытылынырча да аслам эс бурулгъанды.
 

Поликлиника «аяулу технологияла» принципге келиширикди.  Ол санда ОРВИ-лары  эм температуралары болгъанла бирси саусузлагъа къатышмазча этилирикди.  Аны бла бирге  профилактика  бла сабий бёлюмле   акушер-гинекология бёлюмледен башха корпуслада  орналадыла.  Сабий бёлюмде байлаучу кабинет да ишлерикди.  Адам кесини кезиуюн къыйналмай сакъларча  отоу да къуралгъанды.

  Стационарны темир буруулары омакъларына алышындырыллыкъдыла, баш эшигинден кирген жер жангы мардалагъа келиширча боллукъду эм   арбазы да айбатландырыллыкъды.
Эсге сала айтсакъ, бюгюнлюкде поликлиниканы участогуна   69485 чакълы адам киреди. Ишчи планнга кёре, мында бир сменагъа  670 саусузгъа къараргъа жарайды. Кюндюз багъылгъан стационарында да  81 жатар жер барды. 

Объект саулай  келе тургъан айда  хазыр болургъа керекди.

 

Магометланы Сулейман.
Поделиться: