Акъылбалыкъ болмагъан къаллай жууапха тартылады?

Танышымы жашы аманлыкъ этгенине ишеклик барды, алай анга алыкъа 15 жыл толгъанды. Бу жыл санда аны къаллай жууапха тартыргъа боллукъдула?

Ахмат Т., Хасания.

Соруугъа жууапны КъМР-ни прокуроруну тамата болушлукъчусу Сотталаны Жанна береди.

 - 14 жылдан башлап 18 жылгъа дери акъылбалыкъ болмагъанланы аманлыкъла ючюн жууапха тартыуну низамы РФ-ни Уголовный кодексини 87-чи статьясыны  1-чи кесегинде белгиленипди. Анга тийишлиликде, жаш адамгъа тазир салыныргъа, ол борчлу халда хакъсыз ишлеге тартылыргъа, эркинлигине неда бир тюрлю иш бла кюреширге чекле салыныргъа да боллукъдула.

УК-ны 88-чи статьясына тийишлиликде,   акъылбалыкъ болмагъан тартылгъан жууаплылыкъгъа да чекле бардыла. Сёзге, тазирни ёлчеми 1-50 минг сомгъа жетерге боллукъду. Борчлу халда хакъсыз ишлеге уа 40 сагъатдан 160 сагъатха дери тартыргъа эркин этиледи. Жаш адам ишни къарыууна кёре сайлайды, ол аны окъуудан эркин заманда толтурады. 

Акъылбалыкъ болмагъанны тюзетиу ишлеге тартыргъа  да боллукъду - 2 айдан 1 жылгъа дери. Бу кезиуде аны  айлыгъыны 5-20 проценти  тыйылады.  Бу тюрлю жууаплылыкъгъа школда, орталыкъ, бийик билим бериу учреждениялада окъугъанланы  тартыргъа жарайды.  Жаланда  аланы окъууларына чырмау болмазгъа тийишлиди.

Айтханымча, акъылбалыкъ болмагъанны бир тюрлю иш бла кюреширге эркинлиги сыйырылыргъа да боллукъду. 

 

 

Тикаланы Фатима жазып алгъанды.
Поделиться: