Битимчиликде уруннганланы къайгъысын кёре

РФ-ни Эл мюлк министерствосуну битимчилик, механизация, химизация эмда битимлени къоруулау департаментини башчысы Роман Некрасов бу кюнледе Къабарты-Малкъарда болгъанды. Ол мында битимчилик мюлклени башчылары эмда къырал власть органланы келечилери бла тюбешгенди. Жыйылыугъа регионну эл мюлк министри Хасан Сижажев да къатышханды. Ушакъ бу бёлюмню айнытыуну юсюнден баргъанды, дегендиле министерствону пресс-службасында.

Роман Некрасов айтханыча, бизни республика битимчиликни кёп жаны бла жаланда СКФО-да угъай, саулай къыралда окъуна алчы регионнга саналады. Жемишле, наныкъла жыйыуда аны жетишимлери игидиле, дегенди, мирзеуден а былтыр бир миллиондан аслам тонна окъуна жыйылгъанын белгилегенди.

Жыйылыуда урлукъ себиу иш къалай баргъаныны, семиртгичле, отлукъ, техника бла жалчытыуну, къырал болушлукъ бериуню юсюнден да сёлешиннгенди.