Мында бир кере солугъан дагъыда къайтыргъа сюеди

«Маяк» бусагъатда «Нальчик» курортда жетишимли ишлеген санаторийледен бириди деп таукел айтыргъа  боллукъду. Жылны къайсы кезиуюнде да мында солугъанланы  саны азаймайды. Жюз жыйырма адамгъа  жери бар бу санаторий ишлеп башлагъанлы талай жыл болады. Номерледе биришер-экишер адам  жашарча жарашдырылгъандыла . Алада, терезе жабыуладан башлап, хар зат да ариуду, тизгинлиди.

Аны коллективи кесини борчун жетишимли тамамларгъа кюрешеди. Мында ары-бери барыргъа женгил машина, кёп адам болсала уа, автобус  солугъанланы жумушларын тамамларгъа   хазырдыла. Шабат, ыйых  кюнледе уа спортдан инструктор табийгъатха, шахарны башха айбат жерлерине элтеди. Инструктор-массовик Татьяна  Мисостова хар ингир сайын кёп сейирлик оюнла къурайды. Санаторийни столовасында кюнню не заманында да сюйген чай, кофе ичерге, тюрлю-тюрлю ашарыкъланы кесине кереклиси тенгли бир алып татаргъа да  боллукъду.

Мамайланы Галина Магомедовна бери директор –баш  врач болуп келгинчи Калмыков атлы санаторийни поликлиникасында кардиолог болуп ишлеп тургъанды.

Къайда да тынгылы ишлесенг, къыйынлыкъланы хорлаяллыкъса. Тутхан ишими  магъанасын кёрюрге  сюйген адамма. Санаторийге баш врач болуп бар дегенлеринде, угъай деялмагъанма. Бери келгенимде, бу мекямны хали бек осал эди. Аны къабыргъаларындан сора хазна  заты жокъ эди, ала да тозурап. Биринчи кюнледен окъуна башха санаторийледе, пансионатлада ишлеген танышларым, шуёхларым бек уллу болушлукъ этгендиле. Быстырланы окъуна алада жуууп тургъанбыз. Номерлени ичинде мебельлени да ала алып бергендиле.

Бюгюнлюкде хар кимге да борчуму берип  къутулгъанма. Энди мында кесибизни  котельнябыз, быстыр жуугъан жерибиз, битеу керекли медицина оборудование бла жалчытылгъан кабинетлерибиз бардыла. Сёзсюз,  тишлеге бакъгъан кабинет да ачханбыз. Къысхасы, кёп затны, мекямдан чыкъмай, хайырланыргъа боллукъду бизде. Бусагъатда, солугъанланы саны артыкъ кёп тюйюл эсе да, ишибизни тохтатмагъанбыз. Жылыу  келгенлей, ала да кёп боллукъдула,-дейди баш врач.

 «Маякда» ким сюйсе да, ол солургъа боллукъду. Путёвканы багъасы, башха санаторийлеге,  пансионатлагъа къарагъанда,  артыкъ уллу тюйюлдю. Солугъанлагъа къарау, тюрлю-тюрлю багъы-профилактика ваннала, массаж, кёп башха затла путёвканы багъасына киредиле. Санаторийни кесини саунасы, артыкъ уллу болмагъан бассейни, тренажер залы да бардыла. Мында жюреклери, нервалары, аш орунлары, санлары ауругъанлагъа багъадыла. Санаторийде бир кере солугъан экинчи да къайтып келирге сюеди. Биргелерине тенглерин, жууукъларын, танышларын алып къайтханла да бардыла.\

- Коронавирус кенг жайылгъан заманда уа  бизде экинчи номерли шахар клиника больницада  ишлеген  врачла  тургъандыла.  Биз аланы  мында тургъан  кюнлеринде ач этмезге, къыйын ишлерин, кёрген къыйынлыкъларын  бир кесек окъуна женгиллетирге,  унутдурургъа  кюрешгенбиз,-дейди Галина Магомедовна.

Санаторийге  келгенлеге мында ишлегенле жарыкъ тюбейдиле, ёз адамларынача иги боладыла. Солугъанла, къауум- къауум болуп, Минги тауну, Чирик кёлню, Чегем чучхурланы тийрелерине барыргъа онг табадыла. Санаторийни бир-бир отоуларында тюрсюнлю телевизорла, холодильникле , телефонла да бардыла. Сюйген заманынгда бассейнде жууунургъа, шашка, шахмат, бильярд ойнаргъа да боллукъду. Бек игиси уа  солуу юйню  кесини да аламат тап жерде орналгъаныды. Аны  къаты бла кёп маршрут таксиле жюрюйдюле. Шахарны  къалайына да  жетерге боллукъду. Мекямны тёгерегинде жаяу жюрюрча жолчукъла, солурча  шинтикле, тюрлю-тюрлю терекле, юлкюле, жай  кезиуде уа гюлле ёседиле. Ала ол тийрени бютюн ариу  этедиле.