Миллет проектлени тамамлауларына къарагъандыла

Къабарты-Малкъар Республиканы Башчысында къуралгъан Стратегиялы планланы эм миллет проектлени советини президиумуну жыйылыуу болгъанды, ол КъМР-ни Правительствосуну Председатели Мусукланы Алийни башчылыгъында бардырылгъанды.   

Быйылгъы жылда «Россей Федерацияда саулукъ сакълауну биринчи звеносун жангыртыу» федерал проект регионда къалай тамамлагъаныны  юсюнден  КъМР-ни саулукъ сакълау министри Рустам Калибатов айтханды, деп билдиргендиле республиканы оноучусуну пресс-службасындан.

Сагъынылгъан проектни жашауда бардыра, Нальчикде тёрт поликлиниканы   тынгылы ремонту бошала турады. Андан сора да Зольск, Чегем, Терк эм Черек муниципал районлада поликлиникала жангыртылынадыла.     Нальчикни шахар сабий поликлиникасы эм Бахсанда поликлиника бёлюмню, Аушигерде амбулаторияны, Нарткъалада районла аралы кёп функциялы больницаны ремонтлары барады.

Элбрус элде участка больницаны эм Кубада амбулаторияны мекямын биринчи кезиуюню къурулушлары башланнгандыла. Бюгюнлюкде ишлени бардырыргъа керек затланы мажарадыла. 

Республиканы поликлиникаларына 55 медицина оборудование сатып алыргъа ырысхы бёлюннгенди. Юч цифралы рентген аппарат, аллай бир да ультразвук бла къарагъан система хайырланыргъа берилгендиле. Андан сора да бек керек медицина оборудованияны сатып алыргъа тийишли къагъытла жарашдырылгъандыла. Медицина жаны бла терк болушлукъ тапдыргъан он алты автомашина мажарылгъанды.

 Экинчи сорууну сюзе Къабарты-Малкъар Республикада «Туризм эм къонакъ алыуну индустриясы» миллет проектге кирген «Турист инфраструктураны айнытыу» регион проектин ким бардырлыгъын эм  жууаплыла белгили этилгендиле.

 «Туризм эм къонакъ алыуну индустриясы» деген миллет проектге кёре 2030 жылгъа дери къыралны ичинде айланнган  жолоучуланы саны  2,2 кереге кёбейирикди, не да ол кезиуню ичине солугъанланы 140 миллион адамгъа жетдирирге мурат барды.

Бу проектни мурдорунда къыралда болгъан турист кластерле кенг хайырланыллыкъдыла, ол саннга  КъМР-ни  турист-рекреация кластери да киреди.  Советни жыйылыууну ишине КъМР-ни Правительствосуну Председателини орунбасары Марат Хубиев, КъМР-ни экномиканы айнытыу министри Рахайланы Борис эм аны орунбасары Хусен Тимижев, КъМР-ни финансла министри Елена Лисун, КъМР-ни саулукъ сакълау министри Рустам Калибатов эм аны орунбасары Марат Кармов, КъМР-ни къурулуш эм жашау -коммунал мюлк министри Алим Бербеков эм аны орунбасары Локьяланы Алан къатышхандыла.

Жыйылыуну итогларына кёре,  тийишли рекомандацияла эм буйрукъла берилгендиле.

 Бизни корр.