Жоллада иш къазауат барады

Экинчи Чегем – Булуннгу жолну Хушто-Сыртны ичи бла баргъан кесегинде жангыртыу ишле барадыла. Саулай айтханда, быйыл Тёбен Чегемден бу элге дери участкасында мадар этилликди. Аны бошагъандан сора уа подряд организация чучхурлагъа дери баргъан жолну жангыртырыкъды. Проектине кёре жолну кенглиги он метр боллукъду, ол санда эки жанында битеу да юч метри тротуарлагъа бёлюнюрюкдю. Специалистле аны бир-бир жерлерин къырып, тюзейтип, асфальт жаяргъа алай хазырлайдыла.

Асфальт эки къатлы боллукъду. Биринчиси жолну мурдорун тюзетирча деп жайыллыкъды, экинчиси уа аны сыйдам эмда чыдамлы этерикди.

Республиканы Жол мюлк управлениясыны келечиси Астемир Кумыков билдиргеннге кёре, шёндю элни ичинде иш тохтаусуз барады. «Специалистле эски асфальтны къырып кетергендиле, энди уа жангысын жайып башлагъандыла. Бу участканы узунлугъу жети километрден артыкъ болады. Мында хар нени да быйыл ючюнчю кварталда этип бошаргъа таукелбиз», - дегенди ол.

Бу кюнледе республикада энтта да талай жоллада ремонт ишле барадыла. Урван районда сегиз километрлик участкада эски асфальтны къырып, башында айтылгъаныча алай жангырта турадыла. Аны хайырындан жол энтта да беш жылны жарап турлукъду. Прохладна районда Благовещенка элде уа специалистле Маданият юйню, школну, килисаны, сабий садикни эмда фельдшер-акушер пунктну аллары бла баргъан жолну тап халгъа келтире турадыла. Асфальт жайып бошагъандан сора, анда белгиле эм буруула орнатырыкъдыла, автобусла тохтаучу жерни да жарашдырлыкъдыла. Ново-Ивановское элде да «Ленинцы» предприятие таба баргъан 1,8 километрлик жол жангыртыла турады. Анда ишлени быйыл биринчи сентябрьге дери тамамларгъа таукелдиле.  

 

Омарланы Мурат хазырлагъанды.
Поделиться: