Уллу Ата журт урушну тарыхын ахшы билгенлерин кёргюзтгендиле

Къабарты-Малкъарны Жамауат палатасында Жаш тёлю советни башламчылыгъы бла республиканы жаш аскерчилерини араларында «Эсде тутабыз, ёхтемленебиз!» деген аты бла викторина бардырылгъанды. Ол Уллу Хорламгъа 77 жыл толгъанына аталып къуралгъанды.

Викторинагъа республиканы битеу 13 районундан «ЮНАРМИЯНЫ» келечилери къатышхандыла. Жыйылгъанланы алгъышлай, палатаны башчысы Хазратали Бердов, эм алгъа, Жаш тёлю советге бу ишни къурагъаны ючюн ыразылыгъын билдиргенди. «Мероприятияны баш борчу ёсе келген тёлюлени къыралыбызны тарыхына сейирлерин къозгъауду, 1941-1945 жыллада Уллу Ата журт урушда болгъан затланы терсине буруп чыгъаргъанла бла къажау кюрешди. 9 майда фашист Германия бла къазауатда Хорламны белгилерикбиз. Андан бери 77 жыл ётгенди, алай ветеранларыбызгъа, концлагерьледе азаплыкъ сынагъанлагъа, сабийликлери къанлы кезиуге тюшген адамлагъа ол тюнене болгъанчады. Бизге уа уруш – ёмюрледе эсибизде къалыргъа тийишлиди тарыхды. Бюгюнлюкде, къыйын кезиуде, сабийле Уллу Хорламны эсде тутханлары, аны юсюнден билимлерин ёсдюргенлери, Россейни Презденти Владимир Путин, Украинада фашизмни къурутур ючюн операция жанлы болгъанлары, айхай да, къууандырады», - дегенди Хазратали Александрович. 

«РИРАДА» студиядан РИРАДА София Мажагова «Верните память» деген жырны жырлагъандан сора, залда тургъанла барысы да бир минутну шош туруп, Уллу Ата журт урушда ёлгенлени эсгергендиле.

Викторина 5 кесекден къуралгъанды: «Урушну бушуулу башланнганы», «Жигит-шахарла», «Уллу Ата журт урушну кезиуюнде чыгъармачылыкъ», «Уллу сермешле», «Айтхылыкъ адамла». Юнармиячыланы билимлерие багъа уа урушну, урунууну, сауутланнган кючлени эм право низамны сакълаучу органланы ветеранларыны республикада бёлюмлерини башчысы Мухамед Шихабахов, «Аскер къарындашлыкъ» битеуроссей жамауат организацияны регионда толтуруучу комитетини таматасы  Владимир Абаноков, «Къызыл Жулдуз» орден бла эки кере саугъаланнган Афганистанда къазауатны ветераны Евгений Смирнов бичгендиле. Викторинаны палатаны аппаратыны башчысы Анна Дьяченко бла Жаш тёлю советни комиссиясыны таматасы Мурат Дохов бардыргъандыла.

Жаш адамла соруулагъа жууапланы тюз бергенлерин, Уллу Ата журт урушну тарыхын иги билгенлерин белгилерге тийишлиди. «Сизни билимизге беш салама. Бусагъатда ёсе келген тёлю тюз, окъууну, ниет, патриот халда юйретиуню жолуна сюелгенине энтта бир кере тюшюндюк. Тамблагъы кюнюбюзге ышанып къарарчады, биз сизни бла ёхтемленебиз, къыралыбыз жашнар ючюн кюреширигизде жетишимли болуругъузну тежейбиз», - дегенди Мухамед Шихабахов.

Эсеплеге кёре, биринчи жерни Бахсан районну къаууму алгъанды, экинчиге – Черек районну, ючюнчюге уа Май районну командалары чыкъгъандыла. Алагъа палатаны сыйлы грамоталары бла саугъала берилгендиле, башха командала да белгиленнгендиле.

Ахырында жыйылгъанла барысы да бирге суратха тюшгендиле, студияны келечилери Лана Канукоева бла Амина Нагоева уа жырлары бла къууандыргъандыла.

Бу викторинаны жыл сайын бардырыргъа оноу этилгенди.