Сынамлы устазла, ёхтемлендирген окъуучула

Лашкутаны мектеби Элбрус районда  эм жаш окъуу юйледен бириди ол алчыланы жыйырма жыл боладыла. Арт кезиуде «Билим бериу» миллет проектни чегинде аны ырысхы-техника  къолайын  игилендириу жаны бла уллу иш тамамланнганды: дерсле бардырылгъан кабинетле битеу керекли инвентарь бла жалчытылыннгандыла; физиканы, химияны, информатиканы кабинетлеринде шёндюгюлю компьютерле, технологиядан дерследе керек болгъан  инструментле, тигиучю машинала бардыла;  интерактив къангала, алты мультипроектор, тепдирилиучю экран алыннгандыла.

Школну библиотекасында керекли китапла, дерслеге эм аладан тышында бола тургъан ишледе хазырланырча информация материалла тамамдыла. Физкультура эм спорт бла кюреширча да битеу онгла этилгендиле: талай жыл мындан алгъа зал жангыртылгъанды, кийинирча, жууунурча отоула да ишленнгендиле. Анда баскетбол, волейбол, стол теннис ойнаргъа,гимнастика бла кюреширге боллукъду.

Жалгъан кырдыгы бла футбол майдан, тренажёрлары бла да майдан сабийлени сакълайдыла. Ашханасында бир кереге 40 сабийни ауузландырыргъа жарарыкъды, аш-азыкъ бузулмай сакъланырча камерала да жетишедиле. Исси аш окъуучуланы барысына да бериледи. 

 Сабийле окъуудан  бош заманларын хайырлы ётдюрюр ючюн «Жаш биолог» деген илму, «Кавказны таулары», тепсеукъол усталыкъгъа юйретген  «Бисеринка» программала къуралгъандыла, алагъа школчуланы 75 проценти жюрюйдюле. Окъутуу планнга тийишлиликде 1-11-чи класслагъа жюрюгенлени барысы бла да дерсден тышында иш бардырылады. Маданият юй эм библиотека бла байламлыкъла тохташдырылгъандыла, Элбрус районну спорт школу уа анда боксдан бла ауур атлетикадан секцияла ачханды, сабийле  жарау этедиле, эришиуледе жетишимли да боладыла. 

Жыл сайын мектепни орта эсеп бла беш адам бошайдыла, аланы кёбюсю  орта эм биийик билим берген учреждениялагъа киредиле. Устазланы коллективи Россейни Президентини грантын алгъан Ахматланы Зейтун, «Машук-2021» форумда бла СКФО-да  жаш тёлю проектлени конкурсунда грантла къытхан Малкъарланы Жамиля бла ёхтемленеди.

Школ ачылгъанлы бери анга башчылыкъны Малкъарланы Шахризада Исхаковна этеди, ол кеси заманында кадрланы излеу, юйретиу-окъутуу ишни къурау бла къаты кюрешгенди, бюгюнлюкде школну бир механизмча ишлегенинде аны къыйыны уллуду. Бусагъатда школда ишлеген устазладан ючюсюнде – бийик, жетисинде да биринчи квалификация категориялары бардыла.

Малкъар тилден бла адабиятдан устаз Ахматланы Марина мында мектеп ачылгъанлы ишлейди. Ол Къабарты-Малкъар къырал университетни тарых-филология факультетин тауусханды, усталыгъы, огъурлулугъу ючюн коллективини аллында намысы жюрюйдю. Марина Залкуфовнаны окъуучулары муниципал эм республикалы олимпиадалада хорлагъанланы къауумуна дайым киредиле. 

Физикадан бла информатикадан окъутхан  Жаболаны Сулейман «Жылны устазы» битеуроссей конкурсну муниципал кезиуюнде, «Эм иги устаз» эришиуде хорлагъанды, республиканы Правительствосуну сыйлы грамотасы эм «Россей Федерацияны  битеулю билим бериуюню сыйлы ишчиси» белги бла саугъаланнганды. Малкъар тилден бла адабиятдан дерсле берген Хаджиланы Фаризат «Жылны устазы» район конкурсну «мастер-класс» номинациясында биринчи жерни алгъанды, математикадан юйретген Ирина Шогенова уа лауреат болгъанды.

Орус тилден бла адабиятдан устаз Гюлюйланы Зухура, биологиядан бла химиядан устаз Жаппуланы Асият, директорну юйретиу иш жаны бла орунбасары Малкъарланы Светлана  окъутуу ишни тынгылы бардырадыла. Башланнган классланы устазлары  Хубуйланы Асиятны  бла Аминатны, Къалабекланы Марианнаны, Малкъарланы Зульфияны  усталыкъларына да бийик багъа бичиледи.      

Быйыл школда 97 сабий окъуйдула, аладан онекиси биринчи классдадыла, бешиси да – онбиринчиде. Школгъа дери билим берген  бёлюмге оналты бала жюрюйдюле. Сабийлени окъутууну сыйлы борчун мектеп тынгылы  тамамлайды.

       

Анатолий ТЕМИРОВ.
Поделиться: