Казбек Коков кезиулю «муниципал сагъатны» бардыргъанды

 КъМР-ни Башчысы Казбек Коков  кезиулю «муниципал сагъатны» бардыргъанды. Анга КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, КъМР-ни Правительствосуну Председателини орунбасары Марат Хубиев,  муниципал къуралыуланы оноучулары къатышхандыла. Анда  санкцияланы болумларында миллет проектле бла федерал программала къалай толтурулгъанларына къаралгъанды

Мусукланы Алий билдиргеннге кёре,  муниципалитетледе  6 регион проектни толтурургъа белгиленеди. Бюгюнлюкде 169 муниципал келишим этилгенди. Ол а аланы битеу саныны 96 процентин тутады. «Быйыл ишибиз алгъындан эсе терк барады», - деп чертгенди премьер-министр.

 Ол айтханыча, миллет проектлеге бёлюннген ахчаны ёлчеми да былтырдан эсе эки кере асламды. Алты регион проектден  экиси толтурулгъанды. Ала быладыла: «Хунерли адамла» эмда эски юйледен кёчюрюу. 29 мектепге тынгылы ремонт этилине турады.

 Казбек Коков подряд организацияланы ишлерине, контрольну кючлендирирге, бир тюрлю тыйгъыч чыкъгъанлай, регион оноучулагъа билдирирге буюргъанды.

 Жыйылыуда суу ызланы жангыртыуну андан ары бардырыргъа, социал газификацияны къырал программасына кёре ишлени тохтатмазгъа кереклисини юсюнден айтылгъанды. Быйылны планына 13 объект киреди, ол санда суу ызланы 50 километрин алышындырыргъа белгиленеди, Куба, Тёбен Куркужин, Сармаково, Лячинкъая, Нартан, Быллым, Огъары Куркужин, Анзорей, Эски Черек, Къара-Суу, Бабугент,  Къашхатау эллени бла Терек шахарны тийрелеринде суу чыгъарыкъ 4 жер къазыллыкъды. Газ тартыуну андан ары бардырыуну планы тюзетиле турады.

 Регионну оноучусу Къабарты-Малкъарда миллет проектлени толтуруу селеймей бардырылгъанын, бир-бир ишлери  уа болжалдан алгъа окъуна тамамланнганларын белгилегенди. Жаланда суу ызланы жангыртыугъа бла жангыларын ишлеуге 5 миллиард сом чакълы бир бёлюннгенди, деп эсгертгенди Казбек Коков, Бахсанда бирикген суу ызны тартыу, Нальчикни жангы жашау журт тийрелерин суу бла жалчытыу, Азау таладан Элбрус элге дери канализация коллекторну жангыртыу дегенча уллу проектлени юслеринден сагъына.

-Барыбызны да борчубуз бирди – миллет проектлени бла федерал программаланы тынгылы эмда заманында толтурургъа. Аны бизни экономикагъа хайыры айтып айтмазча уллуду. Быйыл миллет проектлени бардырыугъа 12 миллиард сомдан артыкъ бёлюннгенди. Ол ахча Къабарты-Малкъарны экономикасына ишлейди, - дегенди Казбек Коков.

Сёз «Ёлюмсюз полкну» барыуун къурауну юсюнден баргъанда, республиканы оноучусу  ол магъаналы иш бийик даражада ётдюрюлюрге керек болгъанын айырып айтханды. «Ол жамауатны излемиди. Бек башы  — анга хар сюйген адам къатышалырча этиудю, къоркъуусузлукъну жалчытыуду»,- деп чертгенди.