Сабийлени эркинликлерин сакълауну эм ол жаны бла бардырылгъан ишни сюзгендиле

Къабарты-Малкъар Республиканы Башчысы Казбек Коков КъМР-де Сабийни эркинликлери жаны бла уполномоченныйи Светлана Тлинова бла ишчи тюбешиу къурагъанды. Сабий омбудсмен Къабарты-Малкъар Республикада Сабийни эркинликлери жаны бла уполномоченныйни 2021 жылда ишини эсеплери бла байламлы жыл сайын докладын туура этгенди.

Светлана Тлисованы билдиргенине кёре, республикада сабийлени саны 207,5 мингден асламды. Кёп сабийли юйюрледен сабийлени къауумуна 27 минг юйюрден асламысы саналады, акъылбалыкъ болмагъан сабийлери 108 минг юйюрден асламысында барды. Къабарты-Малкъар Республика сабийлени тууарларыны коэффициентлери бла битеуроссейлиледен бийик болгъан регионланы санына киреди: жамауатны 1000 адамына – 12,2, РФ-де – 9,6.

Къырал себеплик изленнген юйюрледен сабийлени къаууму энчи къараудадыла. Социал сетьледе эм асламлы информация органлада акъылбалыкъ болмагъанланы эркинликлерин бузуу белгилеге тохтаусуз эс бурулгъанлай турады. Жууаплы службала бла бирге амалла этилинедиле. Быйыл консультация болушлукъ берилирча КъМР-де Сабийни эркинликлери жаны бла уполномоченныйде Сабий жамауат совет къуралгъанды.

Право сакълаучу органланы эм муниципалитетлени къатышыулары бла тинтилген обращенияланы эки жылны ичинде азая баргъанлары белгиленнгенди. Эм кёп обращение, деп белгилегенди омбудсмен, акъылбалыкъ болмагъанланы юйюр, билим бериу, жашау журтла эм ырысхы бла байламлы эркинликлерин сакълауда чыгъадыла.

Ишчи тюбешиуню ахырында Казбек Коков омбудсмен бардыргъан тинтиуню эм муниципал къуралыула толтургъан ишни эсеплерине кёре жууаплы ведомстволаны контрольларын кючлерге буюргъанды. Республиканы оноучусу ведомствола аралы байламлыкъланы мындан арысында да кючлениулерини магъаналылыгъын белгилегенди, ол санда сюд приставла бла бирге ишлеуню да.

Къабарты-Малкъарда саулукъларында чекленнген онглары болгъан сабийле бла иш андан ары бардырылады. Республиканы бюджетинден ырысхы бёлюннгенинден сора да, бюджетден тышында Огъурлу ишлени фондундан ахча чыгъарылады. Регион Россейни Президенти жашауларына къоркъуулу къыйын ауруулары болгъан сабийлеге тутхучлукъгъа деп къурагъан «Круг добра» фонд бла байламлыкъ жюрютеди. Ары аркъаларында сингир атрофиялары болгъан тогъуз сабий бла байламлы заявка жиберилгенди. 2021 жылны эсеплерине кёре, Огъурлу ишлени фонду къыйын ауругъан сабийлени багъыуларына эм багъыудан сора къайтышыуларына 75 миллион чакълы бир сом бёлгенди.