Картоф эм башха тахта кёгетле ёсдюргенлеге къырал болушлукъ берилликди

«Тахта кёгетчиликни эм картоф ёсдюрюуню айнытыу» федерал проектни чеклеринде къыралны жанындан субсидияланы гитче эм орталыкъ  предприятияла алыргъа боллукъдула. Быллай болушлукъ кесини энчи бахчасын сюрген инсаннга да берилликди.

Алай бла  федерал правительство картофну эм башха тахта кёгетлени ёсдюргенлеге этилген себепликни кенгертеди. Ол жаны бла бегимге премьер-министр Михаил Мишустин къол салгъанды.

Субсидияла агротехнология жумушланы бардырыугъа, тахта кёгетлени ачыкъ топуракъда неда теплицалада ёсдюргенлеге юлешинирикдиле. Ахча федерал бюджетден бериледи. Аны ёлчеми уа ёсдюрюлген продукциягъа кёре саналлыкъды.

Къырал себеплик  тахта кёгетле асыралгъан жерлени ишлетгенлеге неда аланы жангыртханлагъа да этилликди. Ала  къоранчланы тёртден ючюсюн къайтараллыкъдыла. Проектлени   Эл мюлк министерствода къуралгъан энчи комиссия сайларыкъды.

Бюгюнлюкде   жерчилик бла кюрешгенлеге болушлукъ эл мюлкню айнытыу жаны бла къырал программаны чеклеринде этиледи. «Тахта кёгетчиликни эм картоф ёсдюрюуню айнытыу» федерал программа   2023 жылда 1 январьдан ишлеп башларыкъды. Тахта кёгетлени асырау жерлеге субсидияла уа 2024 жылдан башланып юлешинирикдиле.