Кубокла, саугъала да алгъандыла

Озгъан шабат кюн Нальчикде 14-чю номерли гимназияда «Волейболдан школ  лиганы» финал эришиулери бардырылгъандыла. Саугъа къоллу болур ючюн финал эришиуледе  29-чу, 14-чю номерли гимназияланы,  2-чи номерли лицейни эмда 5-чи номерли мектепни окъуучулары тюбешгендиле.

 Эришиулени къууанчлы халда ачылыуларына  КъМР-де спортда, искусствода, билим бериуде эмда илмуда фахмулу сабийлени ачыкълау жаны бла «Антарес» регион араны   башчысыны орунбасарлары Инал Кушхов эмда  Анжелика Пшехачева, республикада кёп функциялы жаш тёлю араны  социал-право эмда профилактика иш жаны бла бёлюмню начальниги  Ратмир Каров,  КъМР-де волейболдан федерацияны президенти Руслан Гоноков, 1-чи номерли спорт школну директоруну орунбасары  Тимур Богатырев да къатышхандыла.

 «Школ волейбол лиганы финал кесегини эришиулери ачылгъаны бла алгъышлайма! Мында Нальчик шахарны бек кючлю командалары бардыла, ала кеслерини усталыкъларын кёргюзтюрюкдюле. Бюгюн ким къаллай кёрюмдюле болдургъанларына да къарамай, толу эркинлик бла айтыргъа эркинме, мында хорлатханла боллукъ тюйюлдюле. Проектни уллу онглары бардыла, ала келир жыллада бютюн кенг  хайырланыллыкъдыла. Сабийлени араларында  эришиулени бардырыу, республикада спортну бу тюрлюсюн  айнытыугъа себеплик этерикди»,- деп белгилегенди Инал Кушхов.

 Турнирге къатышханланы аллында  «Кюнлю шахардан» «Гелиос» эмда «Экстрим» чыгъармачы коллективле тепсегендиле, жырлагъандыла.

 Матчны эсеплерине кёре, Лигада  14-чю номерли гимназияны командасы биринчи жерге тийишли болгъанды. Ол  29-чу гимназияны 3:0 эсеп бла  хорлагъанды. 29-чу гимназия  2-чи жерге чыкъгъанды.  Ючюнчю жер а  2-чи номерли лицейчилеге жетгенди. Ала да  мектепчилени 3:0 эсепге жетдирип, алгъа чыкъгъандыла.

Хорлагъанла эмда экинчи, ючюнчю жерлеге тийишли болгъанлагъа  кубокла, майдалла,  эсде къаллыкъ саугъала да берилгендиле. 

 Бюсюреу письмоланы эришиулени къурагъанла, судьяла, жарау этдириучюле: Руслан Гоноков, Тимур Богатырев, волейболдан тренер  Анна Коноплева эмда Альберт Каширгов, физкультурадан устазла Ислам Кумахов, Астемир Мацухов эм Анжелика Павлова да алгъандыла.

«Волейболдан школ спорт лига» - ол спортну бу тюрлюсюн сюйгенлени, ойнагъанланы араларында  эришиулени бир кесегиди. Башда айтылгъаныча аны  «Антарес» ара эмда КъМР-де «Волейболдан федерация» къурагъандыла.