Урунуу эм ана махтаулукъну да иеси

Гуппойланы Маймулат 1934 жылда Къашхатауда туугъанды. Кёчгюнчюлюкню онжыллыкъ къызчыкълай сынагъанды. Кеси айтханыча, аны бла сабийлиги бошалгъан эди.

Ол кёп сабийли юйюрден эди. Ал кезиуде, бирсилегеча, алагъа да бек къыйын болгъанды. Окъуу дегенни юсюнден а сёз да жокъ. Аны ючюн къыз саулай ишге берилгенди. Кеси айтханыча: «Бир кере окъуна тынгылы жукълагъанма деп эсиме тюшюраллыкъ тюйюлме…» Къыз, анасына болуша, ишге берилип, кесин кёргюзтгенди. Артда, талай заман озгъандан сора, ингирги курслагъа да жюрюгенди.

Аланы юйюр Киргизияны Ош областыны Ноокат районунда тургъанды. Маймулат анда колхозладан бирине ишге киргенди. Ал кезиуде чюгюндюр ёсдюрген мюлкде уруннганды, артда фермада ийнек сауучу болгъанды. Аллай ишчилени эришиулерине къатышып, Москвада кёрмючлеге да бир ненча кере баргъанды. 1956 жылда уа «Урунуу жигерлиги ючюн» майдалгъа тийишли болгъанды. Аны анга ара шахаргъа чакъырып берген эдиле.

Бери къайтып келгенде, Маймулат халкъ мюлкню аягъы юсюне салыугъа тири къатышханды. «Къызыл Малкъар» колхозну фермасында малла жыйышдырып, бригада къурайды. Иш къуралып башлагъандан сора, аны сют-товар ферманы башчысы этгендиле. Къызны комсомол бригадасы ийнек сауу жаны бла алчы болгъанды, къырал салгъан планны артыгъы бла толтуруп тургъанды.

1962 жылда аны КъМАССР-ни атындан СССР-ни Баш Советини депутатына айырадыла. 1963 жылда уа ол юйюрлю болады. Районда биринчи комсомол той да ма аныкъы эди. Къууанчха Черек ауузуну белгили адамлары, Правительствону келечилери, башхала да къатышхандыла. Ол кезиуде «Коммунизмге жол» газетде ишлеген Гуртуланы Салых «Таулу къыз жангы жашаугъа бет ачады» деп жазгъанды. Эл советни башчысы Мокъаланы Абука да саугъагъа «Волга» машина берген эди.

Айтханыбызча, Гуппойланы Маймулат СССР-ни Баш Советини 5-чи эм 6-чы чакъырыуларыны депутаты болуп тургъанды. Андан сора КъМАССР-ни Баш Советини депутатына да эки кере айырылгъанды.

Бизден Москвагъа биринчи делегацияны къауумунда баргъан заманны юсюнден сагъына, алагъа анда бек жарыкъ тюбеучюлерин, Юрий Гагаринни, Клим Ворошиловну да кёргенин эсге тюшюреди.

Депутат ишин Маймулат тынгылы бардыргъанды, жууаплылыкъны эм башына салгъанды. Аллына тилеги, жарсыуу бла келген бир кишиге да угъай демегенди, болушханды. Кеси айтханыча: «Ала башха заманла эдиле, депутатны даражасы бийик жюрюген, сёзю да ётген».

Экинчи сабийи туугъандан сора юйюр жашаугъа берилирге тюшгенди. Алай ол ишчи тёлю ёсдюрюп, ферманы да ышанырча къоллагъа къойгъанды. Жарсыугъа, энди ол мюлк жокъду. Бюгюнлюкде да ол тургъан жерни къаты бла ётсе, иш къайнагъан кезиулени мудах болуп тюшюреди эсине.

Юйюр башчысы бла бирге алты сабий ёсдюргендиле. Гуппойланы Маймулат «Ана махтаулукъну» майдалыны юч даражасы бла саугъаланнганды. Алты туудугъу эмда аладан туугъан эки сабий бардыла. Алагъа: «Ишлегиз, кесигизни бет жарыкълы кёргюзтюгюз. Айланнган, жюрюген жеригизде осал затлагъа алданмагъыз, атыгъызны къайда да аман бла айтдырмагъыз, ариулукъ, игилик бла жашагъыз», - деп дайым насийхат этгенлей турады.

Улбашланы Мурат.
Поделиться: