Казбек Коков РФ-ни Федерал Жыйылыууну Федерация Советини таматасы Валентина Матвиенко бла тюбешгенди

Москвада КъМР-ни Башчысы Казбек Коковну бла РФ-ни Федерал Жыйылыууну Федерация Советини таматасы Валентина Матвиенкону ишчи тюбешиулери болгъанды. Ала республикада социал-экономика болумну сюзгендиле, миллет проектле бла федерал программала къалай толтурулгъанларына къарагъандыла.

 Казбек Коков,  санкциялагъа да къарамай, регион экономиканы баш магъаналы бёлюмлерини кёрюмдюлери ёсе баргъанларын айырып айтханды.  «Республиканы промышленность эмда эл мюлк предприятиялары  ишлерин селейтмей бардырадыла. Урлукъ себиу къыстау барады, урлукъла бла семиртгичле жетишир тенгли бардыла. Урлукъланы башха регионлагъа окъуна жиберебиз, ол а бизни импортну алышындырыу жаны бла мадарларыбыздан бириди», - деп белгилегенди КъМР-ни Башчысы. 

 Ушакъны кезиуюнде саулукъ сакълаугъа энчи эс бурулгъанды. Казбек Коков  мартда  регионда бек уллу поликлиниканы къурулушу башланнганын билдиргенди. Ол дунияда алчы лаборатор эмда диагностика амаллары болгъан амбулатор-диагностика арача ишленеди. Республикада биринчи медицина болушлукъ берген бёлюмню ишин жангыча къурау да андан ары бардырылады, багъыу учрежденияла «Саулукъ сакълау» миллет проектни хайыры бла шёндюгю диагностика эм хирургия оборудование бла жалчытылынадыла.

Алайды да, Республикалы клиника больницада жюрекни бла къан тамырланы тинтген энчи компьютер томограф  бла бийик вольтлу магнит-резонанс томограф салыннгандыла. Юч жылны ичинде 12 КТ бла З МРТ, онкодиспансерге да линейный ускоритель алыннгандыла. Республиканы баш магъаналы багъыу  организацияларыны барысыны да бийик класслы диагностика оборудованиялары бардыла. Бюгюнлюкде жангы онкология диспансерни къурулушун ахырына жетдириуню мадарлары этиле турадыла.

  «Шёндюгю заманны школу» федерал проектге кёре республикада быйыл 10  школ ишлене турады. Беш жылны ичинде 63 мектепге тынгылы ремонт этилликди, аладан 19-су быйыл жангыртыллыкъды. «Демография» миллет проектни чеклеринде юч жылны ичинде 50 окъуу юйде  3 жыллары толмагъан сабийлеге деп 2825 жер къуралгъанды. 2021 жылда регион сабийлени школгъа дери билим бериу учреждениялада жерле бла 100 процентге жалчытыуну даражасына жетгенди. Быйыл 1 сентябрьда аллай дагъыда эки объект хайырланылыргъа берилликди.

 КъМР-ни Башчысы Нальчикде буз къаланы къурулушу башланнганыны юсюнден да билдиргенди. Ол сабий-жаш тёлю спорт кластер къурауну уллу проектини биринчи объекти боллугъун да айтханды. Республикада тюрлю-тюрлю бёлюмледе, ол санда туризмде, инвестиция проектле да бардырыладыла. Къабарты-Малкъар къуралгъанлы 100-жыллыгъына Нальчикни юч баш орамы жангыртыллыкъды эмда жангы жамауат тийреле айбатландырыллыкъдыла.

Казбек Коков быйылгъа белгиленнген битеу къурулуш эмда жангыртыу ишле, ол санда инфраструктура жумушла да, тохташдырылгъан болжалларындан кеч къалмай тамамланыллыкъларын чертип айтханды. 

Эки жылны ичинде къырал борч 12,6 миллиард сомдан 6,9 миллиардха дери къысхартылгъанды эмда коммерциялы кредитледен толусунлай къутулургъа  къолдан келгенди. Аны бла бирге республика битеу социал борчларын да белгиленнген заманлада бла ёлчемледе толтурады, деп айтылгъанды ушакъны кезиуюнде. 

Валентина Матвиенко  Къабарты-Малкъар социал-экономика айныу бла таукел баргъанын белгилегенди. Ол бек алгъа республиканы халкъыны, аны уруннганларыны иш кёллюлюклерини, экинчиден а, регионну башчыларыны тюз оноу эте билгенлерини хайырындан болгъанын чертгенди. Федерация Советни таматасы санкцияланы юслеринден да сагъынмай къоймагъанды. Аллай болумда экономиканы тутхучлу айнытыуну жангы, бютюн къыйматлы амалларын табаргъа, гитче эм орталыкъ бизнесге тутхучлулукъ этерге, импортну алышындырыуну тири бардырыргъа керек болгъанын эсгертгенди.

-Былтырны эсеплерине кёре республика иги кёрюмдюле болдургъанды,  аны себепли алагъа къоша барыргъа къолундан келликди. Къабарты-Малкъарда болгъан байлыкъланы бла амалланы адамланы жашауларын игилендириуге бурургъа тийишлиди. Сизге къайсы мадарла къыйматлы эселе да, аланы бардырыгъыз,- дегенди Валентина Матвиенко.

Казбек Коков спикерге Къабарты-Малкъаргъа дайым эс бургъаны, болушханы ючюн жюрек ыразылыгъын билдиргенди эмда Федерация Советни сенаторларына да регионну айнытыугъа, аны адамларыны жашауларын игилендириуге себеплик этерик оноуланы къабыл кёргенлери ючюн ыспас этгенди.