Бахчачылыкъ биригиуледе соруулагъа толу жууапла

«Единая Россия» политика партияны Къабарты-Малкъарда бёлюмюнде гражданлагъа деп бир ыйыкъны ичинде приём бардырылгъанды. Бу ишге Росреестрни республикада Управлениясыны кадастр инженерлери да къатышхандыла. Аны кезиуюнде ары келгенлени бахчачылыкъ эмда дача биригиуле бла байламлы сорууларына жууапла берилгендиле.

«Дача амнистия 2.0» бла байламлы законодательство быйыл сентябрьде кюч аллыкъды. Аны себепли бу ишге къатышмай, адамланы сорууларына жууап бермей боллукъ тюйюл эди», - дегенди Управленияны башчысы Виталий Дмитриев.

«Къырал регистраторла бахчачылыкъ бла кюрешгенлени сорууларына жууап бергендиле, аланы талай кесегин Управленияда сюзерге оноулашхандыла. Ызы бла аланы иелерине, тийишли законланы излемлерин да келтирип, письмола жиберилликдиле», - деп къошханды Нальчикде эмда Чегем районда къырал эсепге салыу жаны бла бёлюмню башчысы Мишарева Жанна.

Кадастр инженер Залина Нахушева уа: «Тийишли специалистле бла бирге биз, дача участокда не зат ишлерге боллугъуну, юйню бийиклигин неллай бир этерге эркинлик берилгенини, жер законодательствону, иеликде болгъан мюлкню къоруулауну юслеринден хапарлагъанбыз», - деп белгилегенди.