Шахарыбызны орамлары тапландырыладыла

КъМР-ни Башчысы Казбек Коков тапландырыу ишле къалай бардырылгъанлары бла шагъырейленнгенди, ала шёндю Нальчикде Къабарты-Малкъар Республика къуралгъанлы 100-жыллыгъын белгилеуге хазырланыу бла байламлы тамамланадыла. Аны юсюнден республиканы оноучусуну пресс-службасы билдиргенди.

Ишчи жолоучулугъуну юсюнден Казбек Коков телеграм-каналда кесини бетинде айтханды. «Ленин, Къулий улу эм Шогенцуков атлы проспектледе ишле къалай баргъанларына къарагъанма. Къурулушчула жолланы тап халгъа келтиредиле, тротуар плитканы алышадыла, жангы чыракъла жанарча этедиле. Юч орамда да къурулуш ишле «Таза кёк» деген  программа бла бардырыладыла. Анга кёре, ток баргъан чыбыкъла жер тюбюне кетерикдиле, шахарны тюрсюню игиленирикди. Жоллада баргъан ишле бла бирге суу быргъыла да алышынадыла. Сёз ючюн, Къулий улу атлы проспектде суу баргъан быргъыла авариялы чекге жетип тура эдиле. Былайда дагъыда Шортанов атлы орамгъа жетген жерде светофор салынырыкъды эм къошакъ халда машинала жюрюген бир полоса ишленирикди. Аны хайырындан жол кенг эм къоркъуусузлу боллукъду», – деп айтылады билдириуде.

Казбек Коков белгилегеннге кёре, Шогенцуков атлы проспектде инженер коммуникацияла кёп къалмай алышындырылып бошалгъандыла. Кешокова орамдан тебиреп Ногмов атлы орамгъа дери участокга асфальт салыннганды, уллу суула баргъан канализация да ишленнгенди. Шёндю къалгъан участоклада инженер сетьлени алышындырыу ишле барадыла. Ленин атлы проспектде тротуар плитка салынырыкъды, жашил зонала боллукъдула, аяулу чыракъла бла орамланы жарытхан жангы система къураллыкъды.

«Ишлене тургъан «Курортный» скверге эм Канукоев атлы орамгъа къарагъанма, алада къурулуш ишле «Шахарда жашау этерге тап болумла къурау» федерал проектге кёре бардырыладыла. Сагъынылгъан сквер ишленирик жети скверден бириди, Нальчикде биз ол къурулушланы сентябрь башланнгынчы бошарыкъбыз. Ол тийреледе 70 терек орнатырыкъбыз», – дегенди Казбек Коков.