Сауутланнган кючлеге кадрла хазырлайдыла

60 жыл мындан алгъа Тырныауузда  партияны  шахар комитетини, шахар советни, профсоюз организацияны, Спорт обществоланы советини, аскер комиссариатны оноулары бла ДОСААФ деген къоруулау спорт-техника организация къуралгъанды. Аны борчу аскер-эсеплеу усталыкъладан водительлени, техника ишчилени хазырлау, жаш тёлюню аскер-патриот халда юйретиу, спортну аскер-прикладной тюрлюлерин айнытыу болгъанды.

Вольфрам-магъадан комбинатны хайырындан тынгылы мюлк-техника хазна да берилгенди, ол организация жумушун тийишлисича бардырырына себеплик болгъанды. Ол ахшы ишлегенине уа шагъатлыкъ ДОСААФ-ны Ара Совети бёлюмню кёп кере белгилегени этеди. Анда организациягъа кёп жылланы башчылыкъ этген Толгъурланы Назирни къыйыны да уллуду.

Шахарны битеу предприятияларында бла учрежденияларында первичный организацияла къуралгъандыла. Элбрус райондагъы бёлюм республикада эм тири ишлегенледен бирине саналгъанды. Ол Россейни Правительствосунда Къырал аскер тарых-маданият араны сыйлы белгиси, бардыргъан излеу иши ючюн СССР-ни Сауутланнган кючлерини ара музейини ыразылыкъ къагъыты бла саугъаланнганды. Анга 14 жылны башчылыкъ этген Хаджиланы Русланнга ДОСААФ-ны Ара Советини эм даражалы саугъасы – «Совет Союзну юч кере биринчи Жигити А.Н. Покрышкин» майдалы, Сауутланнган кючлени запасда офицерлерини биригиулерини миллет ассоциацияларыны белгиси берилгенди, бёлюмню ишчилери бла активистлери да тюрлю-тюрлю майдаллагъа бла сыйлы грамоталагъа тийишли болгъандыла.

- Биз Сауутланнган кючлеге бла халкъ мюлкге водительлени хазырлайбыз, жаш тёлюню ариу юйретиуге, спортну аскер-прикладной тюрлюлерин жайыугъа къошумчулукъ этебиз, - дейди Руслан Рашидович. – Ахыр 12 жылны ичинде, организациябызгъа жамауат-къырал деген даража берилгенли, 3 минг бла жарым водительни хазырлагъанбыз, ол санда 295-син – Сауутланнган кючлеге. Районда ДОСААФ-ны юбилейине бла Ата журтну къоруулаучуну кюнюне аталгъан айлыкъланы бардырабыз, Уллу Хорламны байрамын белгилей, ёлген аскерчилени эсгертмелерине гюлле сала, аскер махтаулукъну жерлерине автопробегле къурайбыз. Ушкокдан атдырыудан, комбинированный эстафетадан, патриот жырдан, аскер тематикагъа викториналаны, жаш адамлагъа чекчиле, афганчыла бла тюбешиулени ётдюрюрге болушабыз. Жаш тёлюню аскер-патриот халда юйретиу бла байламлы ишибизни районну администрациясы, билим бериу эм чекчи управленияла, аскер комиссариат, жамауат организацияла бла байламлыкъда толтурабыз.

Къорууланыу общество ДОСААФ-ны первичный организацияларына ышанады. Тырныауузну 3-чю эм 6-чы номерли мектеплеринде жашланы бла къызланы патриот халда юйретиу бийик даражада тамамланады. 6-чы школну юнармеецлерини отряды «Зарница» аскер-патриот оюнда дайым жетишимли болгъанлай турады. Быйыл бу учрежденияда эки кадет класс да ачылгъанды. 5-чи номерли гимназияда, Быллымны, Кёнделенни школларында да иш къыстау барады. Аны ахшы эсеплери да кёрюнедиле: жаш адамла журтларыны аллында жууаплылыкъны сезедиле, туугъан жерлерин сюедиле, выпускниклени иги кесеги уа къыралыбызны аскер вузларына киредиле.

Обществону районда бёлюмюнде автомобильлени къалай ишленнгенлерин эм жолда жюрюуню жорукъларын кёргюзтюрча битеу керекли оборудованиясы бла юч класс барды. Практика дерслени бардырырча да он легковой эм грузовой автомобиль хайырланыладыла. Юйретиу бла сынамлы, бийик билимли специалистле – Хаджиланы Магомет, Ёзденланы Исмайыл, Геккиланы Магомет – кюрешедиле. Жыл сайын аскер комиссариат бла бирге курсантла-аскерчи автомобилистлени жангы къаууму алынады. Мында окъугъанларындан сора ала Россейни Сауутланнган кючлерине къуллукъ этерге чакъырыладыла.