Тау гид неда инструктор болур ючюн, окъууну, сынауланы да ётерге тийишлиди

 Минги тауда къыралны баш специалистлери В эм С къауумлада тау лыжа инструкторланы бла гидлени хазырлауда юйретиу программаланы бардырадыла, деп билдиредиле «Кавказ.РФ» обществону пресс-службасындан.  

Бу жаны бла усталыкъ алыргъа неда квалификацияларын ёсдюрюрге Россейни тау гидлерини ассоциацияларында, Инструкторланы миллет лигасында, Россейни курт юзюлюуге къажау арасында боллукъду. Минги тауда курслада врачла келгинчиге дери биринчи болушлукъ этерге юйретедиле, тау лыжачыланы альпинизмни энчиликлерине тюшюндюредиле. Жазны ахырына дери билим бериу программаланы 70 адам ётерикдиле, юйретиу баргъан кезиуде алагъа канат жолла бла учузуракъ багъала бла хайырланыргъа онг бериледи.  

Белгилисича, къыралыбызны эм бийик таулада орналгъан «Эльбрус» курорту тири солууну, спортну, тау туризмни сюйгенлени арасыды. Минги тауну къонакъларыны кёбюсю фрирайдны, альпинизмни, трекингни сайлайдыла, ала уа адамдан хазырлылыкъ, усталыкъ да излейдиле.

«Кавказ.РФ» обществону генеральный директору Хасан Тимижев билдиргеннге кёре, гидлени бла инструкторланы усталыкъларын ёсдюрюуге, къоркъуусузлукъну кючлеуге, таулада солууну маданиятын жангы даражагъа чыгъарыу аланы ишлерини баш магъаналы борчларындан бириди. «Эльбрус» курортну жууаплылыгъы лыжа эм канат жолланы тап халда тутуу бла чеклене эсе да, бу затлагъа да уллу эс бурулады. «Ол себепден биз юйретиу башламчылыкъланы бардырыугъа болушлукъ этебиз эм курортубузда гидле бла инструкторла болуп ишлегенлени курсланы расписанияларына къараргъа, юйренирге чыкъгъан бир амалны да ычхындырмазгъа чакъырабыз», - дегенди ол.

 Гидлеге бла инструкторлагъа юйретиу программала халкъла аралы излемлеге кёре жарашдырыладыла, дунияны кёп тау регионларында болгъан курслагъа ушайдыла. Россейни тау гидлерини ассоциацияларыны келечиси Светлана Кузнецова айтханыча, бу курсла бийик качестволары бла белгилидиле. Гид неда инструктор усталыкъны къыйын экзаменни ётмей алаллыкъ тюйюлсе. Адам курсну тёлегенликге, сертификатны экзаменсиз берлик тюйюлдюле: туристлени таулагъа элтирге программаны толусунлай окъуп, битеу сынауланы, ол санда теория, практика жаны бла да тийишлисича ётгенле эркиндиле.

 Минги тауда гидге эм инструкторгъа юйретиу курслагъа хар сюйген бараллыкъды. Сессияла дайым къураладыла, аланы календарьлары уа бир жылгъа алгъа жарашдырылады.