Не жаны бла да себеплик этер муратда

Бу кюнледе  Нальчикде ючюнчю номерли интернат школну мурдорунда  «# ЛЮДИ КАК ЛЮДИ» деген ат бла Битеуроссей  инклюзиялы фестиваль озгъанды. Къабарты-Малкъардан сора да, анга къыралны 52 субъекти къатышханды. Регион майданлада мастер-классла, тюрлю-тюрлю проектле,  башха-башха темалагъа презентацияла да болгъандыла.

Эсгерте кетейик,  сагъынылгъан  фестиваль Аутизмни проблемаларыны юслеринден билдириуле жайыуну Битеудуния кюнюне жораланнганды. Ол жюзле бла былай чекленнген онглары болгъан сабийлеге бла абаданлагъа болушлукъ берген къырал  махкемелени бла жамауат организацияланы бирикдиреди. Андан сора да, алагъа къаллай тутхучлулукъ этерге боллугъуну юсюнден ары жыйылгъанлагъа жангы затланы билирге себеплик болады.

Аутизмлери бар адамла  жамауатха къошулурча не мадарланы хайырланыргъа жарарыгъыны юсюнден да айтылады. Аллай сабийге къарагъан юйюрле да къайсы  махкемеде не болушлукъну алыргъа боллугъуну юсюнден билирге онг табадыла.

Къабарты-Малкъарда быллай сабийлени саны беш жюзден асламды. Аладан 355-си садикледе, школлада, интернатлада билим аладыла. Сёз ючюн, фестивальны республикада майданы болгъан сагъынылгъан интернатда уа 52 жашха  бла къызгъа дефектологла, компьютерле, ассистентле эмда бирси специалистле болушлукъ этедиле, юйретедиле.

Сабийлеге эмда аланы юйюрлерине комплескс халда тутхучлулукъну тийишли халда тапдырыр мурат бла  КъМР-ни Жарыкъландырыу, илму эмда жаш тёлюню ишлери жаны бла министерствосу бюгюнлюкде Москваны къырал психология-педагогика университети бла келишим тохташдыргъанды. Аланы жанындан консультацияла, методикала бла байламлы себеплик  этилликди. Дагъыда быйыл Медицина-социал эмда психология-педагогика болушлукъ этиу жаны бла республикалы ресурс ара къуралгъанды.