Европаны эм терен карст кёлю – Къабарты-Малкъардады

«Лидер» араны къутхарыучулары Чирик кёлню теренлигин ёнчелегендиле, ала тохташдыргъанларыча, ол 292 метрди. Ары дери, 2016 жылда, Орус география обществону алимлери тинтиулерини кезиуюнде карст кёлню теренлиги 279 метрди деген эсеплеге келген эдиле.

МЧС-ни регионда Баш управлениясыны пресс-службасындан билдиргенлерине кёре, къутхарыучула-водолазла, энчи оборудованияны да хайырлана, 1-10-чу апрельде жарау халда орта эм уллу теренликлеге киргендиле.

- Кёл уллу артезиан къуюгъа ушайды. Алгъа жыллада аны не керти теренлигин ёнчелерге, не ол суу бла къайдан толгъанын билирге онг болмагъанды. Бу жол а, 280 метрге тюшгенибизде, дорбунну эслегенбиз, сора аны ичине телеуправляемый аппаратны жибергенбиз, ол 292 метрде кёлню тюбюне жетип тохтагъанды, - деп билдиргенди араны специалисти Роман Бушков.

 Былайда тинтиулени сууну тюбюнде бардыргъан «РБ-Мираж»  аппарат Россейде жарашдырылгъанын белгилерге тийишлиди. Аны болушлугъу бла излеу жумушланы 500 метрге дери теренликде бардырыргъа жарайды. Сора, роботха салыннган манипулятор бла стропорез да техника борчланы толтурадыла. 

Энди Къабарты-Малкъарны Чирик кёлю Европада эм терен кёлледен бири болгъанын таукел айтыргъа боллукъду. Ары дери эм тереннге Хорватияда карст воронка (281 метр) саналгъанды.