Республиканы Башчысы Роспотребнадзорну КъМР-де бёлюмюню коллективине ыспас этгенди

КъМР-ни Башчысы Казбек Коков Роспотребнадзорну КъМР-де Управлениясыны таматасы  Жирослан Пагов бла ишчи тюбешиу бардыргъанды. Республиканы баш къырал санитар врачы регионну оноучусуна 2021 жылда санитар эпидемиология хал осалгъа кетмез эмда хайырланыучуланы эркинликлери сакъланыр ючюн не иш бардырылгъаныны юсюнден отчёт этгенди. 

 Бу тюбешиуню юсюнден Казбек Коков кесини телеграм-каналында билдиргенди. Анда айтылгъаныча, республикада пандемия бла байламлы жукъгъан аурууладан ауругъанланы саны 2020 жылдан эсе 34 процентге кёп болгъанды. Аны бла бирге алты ауруудан, ол санда пневмониядан бла стрептокок инфекциядан, къыйналгъанланы саны азайгъанды. Дифтериядан, столбнякдан, эпидемиялы паротитден, краснухадан эм башха  къоркъуулу инфекцияладан ауругъанла уа ачыкъланмагъандыла.

Республиканы Башчысы Роспотребнадзорну КъМР-де бёлюмюню коллективине жангы коронавирус инфекция жайылгъан кезиуде ишлерин уллу кёл салып бардыргъанлары эмда бийик усталыкълары ючюн жюрек ыразылыгъын билдиргенди. 

«Ишни кёплюгю башыгъызны басып тургъанына да къарамай, сиз регионну халкъыны жашау магъаналы жумушларын тири бардыргъансыз», - деп белгилегенди республиканы Башчысы.

Тюбешиуню кезиуюнде ичер сууну, тюкенледе бла ашханалада сатылгъан аш-азыкъны къоркъуусузлугъун жалчытыугъа энчи эс бурулгъанды.  2020-2021 окъуу жылда Роспотребнадзорну КъМР-де бёлюмю  окъуу юйледе пландан тышында 266 тинтиу бардыргъандыла, аш-азыкъ керекле бла жалчытханладан да 19-суна да контроль этгендиле. Прокуратуратураны органлары бла бирге 63 тинтиу иш этилгенди. «Сабийлени аш-азыкъларына контроль кючлене барлыкъды», -деп чертгенди Казбек Коков.