Сабанлада иш тириди

Кюн ачылып, хауа да жылыннганы бла республиканы районларында урлукъ себиу иш жангыдан башланнганды. Аны юсюнден КъМР-ни Эл мюлк министри Хасан Сижажев айтханды. «Бу кюнлеге аграрчыла беш минг гектарда урлукъ сепгендиле. Саулай айтханда, иш 223 минг гектарда этилирге керекди. Дагъыда кюзлюклеге семиртгичле жайыу барады. Ол 42 минг гектарда тамам этилгенди, кеси да план бла белгиленнген кёрюмдюню 82 процентиди, - дегенди ол.

Министр белгилегенича, къыралда экономиканы халы осалыракъ болгъанына да къарамай, урлукъ себиу тап барады: «Шёндюгю болумгъа эс бурсагъыз, минерал семиртгичлени ташыу тохтаусуз болгъанын кёрлюксюз. Аграрчыла  урлукъла, отлукъ бла да жалчытыныпдыла. Бу ишлени да заманындан кеч къалмай тамамларгъа таукелбиз».

Эл мюлк министерствону жамауат советини башчысы Максим Панагов министерствону ишине бийик багъа бергенди. Аш-азыкъ жаны бла къоркъуусузлукъну эм адамланы продукция бла жалчытыугъа муниципалитетле, эл мюлк товарла чыгъарыучула да тири къатышханларын чертгенди.