Тири болургъа сюе эсегиз жаяу жюрюгюз

7 апрельде, Саулукъну битеудуния кюнюнде, КъМР-ни саулукъ сакълау министри, ведомствону ишчилери эмда Нальчик шахарны медицина учрежденияларында уруннган 200-ден аслам медик «Жашаугъа 10 000 атлам» деген акциягъа къатышхандыла. Алагъа дагъыда КъМР-ни Парламентини Председатели Татьяна Егорова, депутатла, жамауат организацияланы бла партияланы келечилери, студентле, волонтёрла, шахарда жашагъанла бла аны къонакълары да къошулгъандыла.

 Марафонну аллында республиканы саулукъ сакълау министри Рустам Калибатов бла Сюд-медицина экспертизаны бюросуну таматасы Мечукаланы Алийхан баргъандыла. Акциягъа къатышханла Атажукъ улуну терек бахчасындан башлап Курорт залгъа дери 8 километрни ётгендиле, артха да аллай бир жолну къыдыргъандыла.  Жаяу баргъанлагъа суула юлешгендиле, къан басымларын да ёнчелеп кёргендиле. Ахырында уа хар бирине сертификат берилгенди.

 Акциягъа битеу да 500-ден аслам адам къатышханды. «Миллетни саулугъуну лигасы» регион жамауат организацияны башчысы Зарета Камбачокова айтханнга кёре, Саулукъ сакълауну битеудуния организациясы бир кюннге бек аздан  беш минг атлам этмеген адам арталлы да къымылдамагъаннга саналады деп, алай тохташдыргъанды.  «Тири жашау бардыргъаннга жаланда бир кюннге он минг атлам этгенни санаргъа боллукъду. Алай хар адамны кесини энчи рекорду болгъанын да унутмазгъа керекди. Атламланы не къадар кёп этерге итинирге керек тюйюлдю, халигизге кёре жюрюгюз, ол сизге ауур угъай, женгил эм хычыуун кёрюнюрге керекди»,-деп къошханды ол.

Акцияны «Миллетни саулугъуну лигасы» регион жамауат организация, КъМКъУ-ну медицина факультети, КъМР-ни Саулукъ сакълау министерствосу, Нальчик шахарны администрациясы эмда «Капитал МС» ООО -ну бёлюмю къурагъандыла.

 Эсгертиу: «Жашаугъа 10 000 атлам» деген акция РФ-ни битеу субъектлеринде бардырылады, аны мураты – къыралны битеу эллеринде бла шахарларында саулукълу жолла къурау жаны бла къымылдаугъа себеплик этиудю.

                                                       Бизни корр.