Къонакъ сабийлени тургъан болумларына къарагъандыла, саугъала да бергендиле

КъМР-ни Башчысы Казбек Коков «Жер-жерлени айнытыуну фонду» жамауат-праволу компанияны  попечитель советини таматасы Сергей Степашин эмда ол компанияны баш директору Константин Цицин бла Донецк халкъ республикадан келген сабийлени жокълагъандыла. 35 сабий  «Радуга»  реабилитация арада турадыла эмда медицина, социал-психодлогия болушлукъ аладыла.

Республиканы оноучусу къонакъла бла бирге сабийлени тургъан болумларына къарагъанды. Аланы биргелерине келгенле эмда сабийлени кеслери бла ушагъында Казбек Коков аланы саулукълары не халда болгъанын соргъанды эмда республика алагъа не жаны бла да себеплик этеригине ышандыргъанды.

 Сергей Степашин а Къабарты-Малкъар Россейни бек иги регионларындан бири болгъанын чертгенди. «Туугъан жерлеригизге къайтхандан сора да, сиз Къабарты-Малкъаргъа келирге, мында солургъа да боллукъсуз. Мамырлыкъ тохташырына эмда биринчи сентябрьде сиз туугъан Макеевкада жангыдан школгъа барлыгъыгъызгъа ийнанама. Жууукъларыгъызгъа, тенглеригизге, шуёхларыгъызгъа да мында къалай аламат болгъанын айтырсыз»,-деп къошханды Степашин.

 Сабийле, аланы биргелерине келгенле да шахарчыла, бу тийреледе жашагъанла да алагъа къалай жарыкъ тюбегенлерини юсюнден бир бирлерине ал бермей айтхандыла. Келгенле къонакъ сабийлеге эсде къаллыкъ саугъала бла татлы ашарыкъла юлешгендиле.

 Казбек Коков Къабарты-Малкъар Донецк эмда Луганс халкъ республикалада жашагъанлагъа мындан ары да болушлукъ этип турлугъуна ышандыргъанды. Юч ыйыкъдан  бери Донецк халкъ республикадан сабийлени жангы къаууму келликди. Алагъа да «Радуга» сабий арада тынгылы болушлукъ тапдырыллыкъды. Керек болса, ол республикаладан къонакъланы алыргъа Калмыков атлы, «Верошина», «Кавказ», «Долинск» эмда «Курорт «Нальчик» санаторийле да хазырдыла. Сабийле Нальчикни школларында окъурукъдула.