Бешинчи тизгиннге сюелгенлени саны кёбейеди

Россей Федерацияны Сауутланнган кючлери Донбассда бла Украинада бардыргъан энчи аскер операция башланнганлы эки жыйырма кюнден атлагъанды. Андан бери бизни аскерчилерибиз Донецк эм  Луганск республикалада неонацистлени хаталарындан юй тюпледе тургъан неллай бир адамны  жесирликден, тутмакълыкъдан, зулмулукъдан къутултханларыны санап саны да болмаз.

Украинаны аскерчилери эм нацист батальонлары жиберген топладан эм ёлюм келтирген башха сауутладан къоркъуп,тиширыула сабийлери бла,  абадан адамла да, жылла бла кёп фатарлы юйлени тюплеринде жашап тургъандыла.  Аланы бет сыфатлары окъуна айтып турады  хазна кюн  кёрмей тургъанларын, ол санда къагъанакъла да бардыла. Украинли неонацистле, мектеплени, больницаланы, сабий садланы, адамла кёп жыйылгъан жерлени марап, топланы ары атдырып турадыла.

Белгилисича, бюгюнлюкде да  болум  тюзелмегенди. Бизни аскерчилерибиз, шахарланы, эллени    неонацистледен азатлагъандан сора да, ол жерлеге  мычымай  гуманитар болушлукъ тапдырадыла. Шёндю Мариупольну бир тийресинде украинли нацист батальонла мамыр адамланы бир къауумун жесирликге тыйып турадыла. Ала тиширыуланы, уллайгъанланы артларына бугъуп, немисли фашистле совет халкъгъа сынатхан  зулмулукъдан да оздуруп, Донбассны бла  Россейни сауутланнган кючлерине къажау сюелирге кюрешедиле.

Ол болумлада жанларын, къанларын аямагъан аскерчилерибизге кёл этдирир кезиуде, бир -бир ата журтлу артистлерибиз, «жулдузла» дейдиле алагъа бир къауумла къубултуп,   гузабагъа къалып,  тыш къыраллагъа кетип барадыла.  Алагъа къырал къуллукъчула да къошулгъандыла. Къысхасы, «бешинчи колоннагъа» сюелгенлени саны туура бола барады. Болсада, жамауатха  бу кюнледе  этилген  соруула  кёргюзтгенлерине кёре, россейлилени  араларында  Путин жанлыланы саны 81 процентден озупду.

Башда сагъынылгъан болумну эсге ала, Къырал Думаны Председатели Вячеслав Володин кесини  Telegram-каналында былай жазгъанды:  « Бийик къырал къуллукъланы араларында, Украинада бардыргъан энчи аскер операцияны терслегенле, ишлеринден кетерге керекдиле».

«Къыралны казнасындан, башхача айтханда уа, халкъ ырысхыдан ахча алгъан, эм аны ниетлерин сатхан  культура, билим бериу, саулукъ сакълау эм башха  къырал учрежденияланы таматалары жерлерин бош этерге керекдиле. Солдатларыбыз бла офицерлерибиз, къыралны сейирлерин къоруулай, жанларын берип, къанларын тёгюп,  къазауатда тургъанда, аланы алларында кеслерин алай жууапсыз жюрютген бедишди. Министрледен къаты соруллукъду эм айтылгъан шартланы эсге алыу  бла кадрла жаны бла оноула этилликдиле», - дегенди  дагъыда Володин.

Ол юлгюге белгили опера жырчы  Анна Нетребкону келтиргенди. Нетребко Россейни Украинада бардыргъан энчи операциясын терслеп  сёлешгенди. Аны бла байламлы Новосибирскни къырал академия театры жырчыны концертлерин бардырмазгъа оноу чыгъаргъанды.

«Сатхычлыкъ этгенди ол тиширыу, андан башха сёз тапмайма. Аны ариу ауазы барды-бети уа жокъду. Нетребко  кесини байлыгъын бла битеу дуниягъа белгилилигин, къыралыбызгъа сюймеклигинден ёрге салгъанды»,- дегенди Къырал Думаны башчысы.  

Жарсыугъа, аллай  юлгюлени дагъыда келтирирге боллукъду. Былайда бир гитче  шартны эсигизге салайым. Бизни къыралда жашаргъа унамай,  тыш къыраллагъа кёчген  мингле бла инсанларыбыз, пандемияны къайнагъан кезиуюнде мингле бла Россейге къайтып, хакъсыз дарман салдырып, артха кетип тургъандыла, орус халкъны халаллыгъын  хайырланып. 

Шёндю тышына кетген къуллукъчула, ол санда кёп жылланы къыралны ырысхысына оноу этип, юлюшюн да алып тургъан А.Чубайс эм башхала, жамауатха къаллай ниет тутханларын ачыкълагъандыла.   Жырчыларыбызны юсюнден айтханда уа, сатхычлыкъларындан сора да,  ала ары-оракъ,  бери-чалгъы болургъа хазырлыкъларын кёргюзтгендиле.

Кетгенлени санында Чулпан Хаматова, Иван Ургант, Рената Литвинова бла Земфира, Алла Пугачёва бла Максим Галкин, Валерий Леонтьев, Валерия, Ксения Собчак бла Константин Богомолов, Ксения Бородина, Ольга Бузова, Андрей Макаревич, Кантемир Балагов, Жасмин, Григорий Лепс, журналист Александр Невзоров, Леонид Ярмольник эм башхала бардыла.   «Жулдузларыбызны» барысыны да атларын туура этерге бу материалда онг  жокъду. Ала артха къайтмай къалсала иги боллукъ сунама, ол сайлагъан жерлеринде къалып. Аланы асламысы Израильде, Америкада, Прибалтикада турадыла, Донбассда болгъан ишлени «жюреклери кётюралмай», жай кезиу да жетгинчи, аямай солуйдула, халкъдан жыйгъан ахчаларын къоратып.

Аланы юслеринден президентибизни пресс-секретары Д. Песков былай айтханды: «Россей фахмулуладан байды, аланы тышына кетгенлерине бир киши да жарсымайды».

 Дагъыда ол, шабат кюн "Беларусь-1" телеканалгъа интервью бере, Россей энчи аскер операцияны башлагъанлай, къоркъуп, тышына кетгенлени юслеринден былай дегенди: «Ол артистлени ичинде жангылгъанла да бардыла, солургъа барабыз дегенледа бардыла. Алай Россейни  ахырда кёрюп болмагъанла да кёпдюле. Ала энттада бери къайтып, къырал грантланы алыргъа, къырал театрлада ишлерге, къыралны ахчасына алыннган кинолада рольланы ойнаргъа сюерикдиле. Энди аллайлагъа артха жол жабылгъанды». 

Песков ажашхан къауумланы тюз жолгъа салыргъа боллукъду, жаланда ала кеслери сюе эселе алай этерге, деп  да чертгенди.

Былайда айтхылы, битеу Совет Союзгъа белгили жырчыбыз, сау заманында Донецк шахарда эсгертме салыннган Иосиф Кобзонну юсюнден эки сёз айтыргъа тийишли кёреме.   Ол  жигитлиги да болгъан чынтты эр киши эди. Афганистанда уруш баргъан кезиуде, совет солдатланы кёллерин кётюрюп, жырла айтып тургъанды. Эсигизде эсе, Москвада 2002 жылда 23 октябрьде «Норд ост» кинотеатрны  къылыкълары бла шёндюгю украинли нацистлеге ушагъан чеченли боевикле чабыууллукъ этип алгъанда, ала бла сёлеширге Кобзон, бир затдан да къоркъмай, башкеслени араларына кирип баргъан эди.  «Сиз- чеченлиле-вайнахла, уялмай тиширыуланы, сабийлени жесирликде къалай тутасыз, абадан адам аллыгъызгъа келсе, ёрге не турмайсыз»,- деп, «сепаратистлеге» налат бергенди. Сора сёлешиуле бошалгъандан сора, беш адамны, ол санда  сабийлени бла тиширыуланы алып чыкъгъан эди, аны бла аланы ёлюмден къутхарып.

Шёндю аскерчилерибиз Донбассда бла Украинада бардыргъан энчи операцияны магъанасын ангыламагъанлагъа айтырыгъым олду. Россей   аскер операцияны 24 февральда башламаса эди, бир ыйыкъдан украинли аскерчиле эм нацист батальонла Донбассха жангыдан битеу кючлерин да буруп, чабыууллукъ этерик эдиле. Анга шагъатлыкъгъа шарт документле табылгъандыла. Белгилисича, америкалыла НАТО-ну аскерлери бла кёп жылланы ичинде Украинаны Россейге чабаргъа хазырлап, аны жеринде сауутларын орнатып тургъандыла.

Бюгюнлюкде ачыкъ бола тургъан шартлагъа кёре,  адамланы аслам халда къыргъан аурууланы жаяргъа деп 30-дан аслам биолаборатория къурап, тинтиуле бардырып тургъандыла.  Ала Россейни эм Украинаны халкъларына  къаллай  палах  келтирликлерин эсге алып, Россей Федерация ООН-да ол сорууну сюзерге чакъыргъанды. «Бешинчи колоннаны» тизгинине сюелгенле башда сагъынылгъан шартланы эслерине алсала, ангыларыкъ  болур эдиле  аскерчилерибиз Украинада бардыргъан энчи аскер операцияны муратын.

Азретланы Хасан.