Мектеп шёндюгю излемлеге келиширикди

Бу кюнледе школлада билим бериу системаны жангыртыуну  регион  программасына кёре, Тёбен Чегемни мектебине   ремонт этип башлагъандыла. Ишлени кезиуюнде мекям толусунлай жангыртыллыкъды. Ол санда юйню башында къанжалла, эшикле, терезеле, полла, инженер коммуникацияла алышындарыллыкъдыла, къабыргъалары  да жангыдан сюрютюллюкдюле. Аны юсюнден районну администрациясыны пресс-службасындан билдиргендиле.

Кёп болмай  жангыртыу  жумушла къалай баргъаларына къараргъа Чегем районну администрациясыны башчысы Юра Борсов келгенди.  Подраядчикле бла тюбешиуюнде ол ремонтну  окъуучулагъа  чырмамай бардырырча амалланы да сюзгенди.  Аланы  эслерин   качестволу материалла, эм жангы технологияла хайырланылырларына  эм объект  графикден кеч къалмай битерге кереклисине   бургъанды.   

Тынгылы ремонтну чеклеринде  инфраструктура да жангыртыллыкъды. Ол санда  терроризмден  бла от тюшюуден  сакъларча системала да  жарашдырыллыкъдыла.

Келир жыл сагъынылгъан программа бла  Лячинкъаяны орта школуна да тынгылы ремонт этилликди.