Отха сакъ болугъуз!

Къабарты-Малкъарда от тюшюу бла байламлы къоркъуулу кезиу быйыл биринчи апрельде башланнганды. Агъачлада ёртенлени, къаураны къабыннганыны сылтауу асламысында адамдан чыгъады, аланы  уллу кёллюлюклеринден  неда жууапсызлыкъларындан. Аны бла бирге къыйын болумланы санын азайтыу да аны къолундады. Бу кезиуде къургъакъ кырдыкны чексиз, контрольсуз кюйдюрюу бегирек  къоркъуулугъа саналады. От агъачха жетсе, ууакъ жаныуарла, чыпчыкъла, къурт-къумурсха, битимлени зыгытлары да къырылыргъа боллукъдула.

Быллай амалны бир тюрлю хайыры жокъду. От салгъанла суннганларыча, ол жерни минерал затла бла байыкъландырмайды, алай топуракъдан а битимлени онгдургъан кючюн а алады. Быллай башламчылыкъланы ахыры - кюйген юйледиле, юзюлген ток чыпынладыла,  башха хаталадыла.

Россейни тийресинде быйыл къургъакъ кырдыкга от салыннганы ючюн адамла ёлген кезиуле да болгъандыла. Ол себепден КъМР-ни Табийгъат байлыкъла эм экология министерствосу агъачха баргъанда къоркъуусузлукъну тийишли жорукъларын сансыз этмезге чакъырады.

Агъачда от тюшгенин эслесегиз, олсагъат окъуна регионну диспетчер службасыны (88662) 97-38-76 эм 8-800-100-94-00, неда МЧС-ге 01, 101, 112 номерлерине  сёлешигиз.