Онюч жылында абадан разрядны толтургъанды

  Бабугентден Лейля Тюменланы Жансуратны бла Виктор Шевцовну юйюрлеринде 2006 жылда биринчи марда туугъанды. Спортха фахмусу уа аммасындан Бёзюланы Татьянадан келеди, ол кеси заманында кючлю атлетчиге саналгъанды, республикада чемпион атны да алгъанды. Татьяна Магомедовна элде школ-интернатда физкультурадан устаз болуп ишлегенди, чабыу жолгъа туудукъчугъун да биринчи ол сынагъанды. Лейля лагерьде солугъанында, аммасы аны кесинден таматала – жетинчи классланы окъуучулары бла чапдыргъанды, финишге къызчыкъ экинчи болуп жетгенди, саугъасын ол кезиуде республиканы алгъыннгы спорт министри Аслан Афауновдан алгъанды.

Лейля, Татьяна Магомедовнаны ызы бла бара, кёп эришиуде хорлагъанды. Аладан бири Сочиде Къыш Олимпиадагъа аталгъан XXIV битеуроссей олимпиада кюнню чеклеринде бардырылгъан турнирди. Анда Лейля ючюнчю жерге чыкъгъан эди. Кёп болмай а ол Шимал Осетия-Аланияны женгил атлетикадан биринчилигинде хорлагъанды. Анда 200 метрни эм терк чабаргъа керек эди, бу жумушну жерлешибиз 28,4 такъыйкъагъа толтургъанды. Физкультурникни кюнюне аталгъан республикалы эришиуде, Терроризмге къажау кюреш бардырыуну кюнюне жораланнган турнирде да аны озгъан чыкъмагъанды.

Къабарты-Малкъарны биринчилигинде Лейля алтын майдалны къытханды, сора округ даражада да чемпион атын къоруулагъанды – 18 жыллары толмагъан къызланы араларында 200 метрни эм терк ол чапханды. «Урунуугъа эм къорууланыугъа хазырма» (ГТО) битеуроссей комплексни ахшы толтургъаны ючюн айырмалылыкъны белгиси бла саугъаланнганды. Болдургъан жетишимлери ючюн анга спортну устасына кандидат деген ат да берилгенди.

 Бешинчи классда окъугъанында, ГТО-ну нормативлерин алтын майдалгъа бергенинден сора, къызныНальчикде «Спартакны» стадионунда женгил атлетикадан секцияда жарау этерге чакъыргъандыла. Ары биринчи кере келгенинде, 60 метрни 8,5 такъыйкъагъа чапханындан сора, аны жыл санына къарамай, олсагъат абадан къауумгъа алгъандыла. Алай бла ол командасында эм жаш спортчуду.

Аны тренерле Валерий Караненко бла Сергей Садыков юйретедиле, ала къызчыкъны фахмулу болгъанын, итиниулюгюн белгилейдиле. Ол да юйретиучюлерин жарсытмайды – 13 жылында биринчи абадан разрядны толтургъанды. Бирде жетишимле адамны уллу кёллю этерге да боладыла. Алай Лейляны ала бютюн къызыу жарау этерге, тюненеден эсе бюгюн кючлю да, терк да болургъа кёллендиредиле. Спортда хар не да сюйгенингча болуп къалмайды, кеси сюйген эсепге жетмесе, халатла бла ишлейди, аланы къайтармазгъа кюрешеди. Лейляны алда алыкъа кёп эришиуле сакълайдыла, алада жетишимли болурун тежейбиз.