Жукъудан къанмаудан чыкъгъан беш заран

Шахарчыланы тёртден бири  жукъудан къанмайдыла.  Ол жыгъылыуладан бла аварияладан  сора да, саулукъгъа уллу заран келтирирге болады.

1. Ауурлукъгъа  керексиз килограммла къошуладыла

Жукъуну жетмегенини заранын биз татлы затланы ашап селейтирге кюрешебиз. Чикагону университетини  медицина арасыны тинтиучюлери шарт туура этгенлерине кёре,  адамла  жукъу жетмегенни  печенье, чипсы, конфетле бла жалчытыргъа излейдиле. Бу ашарыкъла  уа суткагъа керек калорийлени 90 процентин тутадыла.

- Жукъуну азлыгъы  азыкъдан  зауукълукъ алыу химия реакцияланы  къозгъайды, - дейди  философия илмуланы доктору, Чикаго университетни  эндокринология, диабет эм метаболизм бёлюмюню илму къуллукъчусу Эрин Хэнлон. – Бизни тинтиуюбюз кёргюзтгенди: тынчайыргъа керек заманны жукъусуз ётдюрген хар сагъатыгъыз – ол къошакъ халда 17 калорийди.

Былай къарагъанда, кёп да кёрюнмейди, алай  бу къылыкъ  къайтарылып турса, артыкъ калорийле, сёзсюз, ауурлукъну кёбейтирикдиле.

2. Контрольну тас этебиз

Оналты сагъатны ичинде жукъусуз туруу адамны эсин азайтады, ол акъылын  жыялмай башлайды, жукъу бла жукъламауну араларында къалгъанча болуп.  Сылтаула чыгъып, адам  жатмаса, мыйы микросон деген халгъа тюшгенча болады. Ол дегенибиз,  адамны кёзлери ачылып, алай кеси уа жукълапды. Бу уа не затха буруллугъун  кесигиз ангылайсыз.

Суткагъа беш сагъатдан аз жукъу ауушургъа къоркъууну 15 процентге кёбейтеди.  Бир кече жукъусуз къалгъан адамны хали  эсиргенни халине ушашды – мыйыны теренинде эсеплеучю арала ишлерин тынгылы толтурмай башлайдыла.

3. Эртте окъуна къартайыу

Бир ненча жылны ичинде кечеги жукъугъа 6 сагъатдан аз заманны бёлгенлей тура эсегиз, 10 жылгъа алгъа къартайып тебирейсиз! Антиэйдж терапия (медицинада къартайыугъа къажау направление) жаны бла Бостон университетни  специалистлерини айтханларына кёре,  керекли мардадан аз жукълагъанлада  инсулинни гормонуна (къанда  бал тузну ёлчемлигине жууаплыды)  сезим  азаяды. Аш орунну тюбюнде безге ауурлукъ барып, ол мардасыз къаты ишлеп башлайды. Ол а санда – чархда затланы алышындырыу процесследе чурумла чыгъарады. Аны сылтауундан а къартайыу да эрттерек башланады.

4. Кёбюуле башланадыла

Алимле адамны жукъламай туруу бла байламлы 84 аурууну санагъандыла, ол санда жюрек – тамыр ауруула. Ахыргъыла бла  жукълагъанда  апноэ деген халны байлайдыла. Ол  тынчайгъан заманда солууну бир кесекге тыйылып къалыууду (асламысында апноэ хурулдагъанлада болады). Урологланы европалы ассоциациясыны  алимлери ачыкълагъандыла: апноэ инсультха къоркъуу чыгъаргъанындан сора да,  бюйрекледе кёбюулени  къозгъаргъа болады.  Къысха кезиулю гипоксия (кислородну жетишмегени)  кёбюуню ичинде  къан жюрюген тамырчыкъланы  къуралыуларына себеплик этеди. Аланы болушлукълары бла уа  кёбюу  керекли затладан байыгъады, алай бла ёсген да тири этеди. 

5. Интернетге бойсунуу къылыкъ

Соцсетьледе тирилик  жукъуну бузулгъаныны сылтауу  болады. Ол а - кечеле бла  Интернетден чыкъмазгъа юйренчекликди.