Терекле салыу къыстау барады

  Къабарты-Малкъарда «Агъачланы сакълау» федерал эм «Экология» миллет проектлеге кёре   жууукъ заманда 114 гектарда тийишли ишле башланырыкъдыла. Аны чеклеринде  эмен, чинар, акъагъач, кюйрюч дегенча  бизни жерлеге тёрели тереклени орнатырыкъдыла.   

Жашиллендириу ишле  районланы барсында да этилликдиле.  Бир гектарда 1,5 эм  3,2 минг терекчик орнатыр мурат барды,- деп билдиргенди КъМР-ни табийгъат байлыкъла эмда экологияны къоруулау  департаментни таматасы Хибийланы Ханапий.

Агъач фондлада терекчиклени орнатыу бла бирге агротехника жумушла  да  тамамланадыла. Терекчик бахчалада    заранлы хансланы чагалайдыла, чаладыла, чириген тереклени эм жерге тюшген бутакъланы  да кетередиле.  Быйыл план бла  агротехника ишле  1 651 гектарда бардырыллыкъдыла. Ол санда  135 гектарда  терекчикле кюч алырча мадар этилликди.  Саулай алып айтханда,  агъач мюлкледе    жыл сайын терекчикле  50 гектар чакълы бирде  орнатыладыла. 

Хибий улу айтханнга кёре, Къабарты-Малкъарны агъач питомниги  республиканы  эм къоншу  регионланы да толусунлай  керек материалла бла  жалчытыргъа хазырды.  Бюгюнлюкде мында  терекчикле 135 гектарда ёседиле. Ол санда 125 гектарда эмен эм 10 гектарда да  кийик алма битедиле.  Резерв халда ёсдюрюлген терекле да 270  гектарны аладыла.

Питомникде тынгылы урлукъ алынады  эм тинтиуге Ставропольгъа  Агъачны сакълау арагъа жибериледи. Анда  уа   жарарыкълары айырыладыла.  Аланы хар бирине  энчи  паспортла да бериледиле.    

Эсге сала айтсакъ, былтыр «Экология» миллет проектни чеклеринде Къабарты-Малкъарда 421 минг терекчик орнатылгъанды. Ол  бирси жылладан иги да кёпдю.