Республиканы байрамына – магъаналы китап

Коммунист партияны регионда бёлюмюнде «Они сделали все, что могли…» деген китапны къууанчлы халда презентациясы болгъанды. Аны авторла регионда Адамны эркинликлери жаны бла уполномоченный Зумакъулланы Борис бла партия бёлюмню башчысы Борис Паштов жарашдыргъандыла.

Бюрону жыйылыуун ача, Борис Паштов бу китапны басмалау республиканы жамауат-политика жашауунда уллу магъананы тутхан иш болгъанын чертгенди.

- Проектни башламчысы Борис Мустафаевичди, аны жашау жолу тюз ниетлеге кертичиликни юлгюсюдю. Китап Къабарты-Малкъар Республиканы къыраллыгъына 100 жыл толгъанына, СССР къуралгъанлы да 100 жыл болгъанына сыйлы саугъады, ол жыллада уруннган, республикабызны тамблагъы жарыкъ кюню ючюн къыйын салгъан адамлагъа уллу хурмет этиуню белгисиди. Анда регионда болгъан тарых ишле, ол санда къыйын, ахшы кезиулери суратланадыла. Бу китапны жазыугъа Зумакъулланы Борис жууаплы кёзден къарагъанды, автор анда сагъынылгъан хар инсаннга ыспас этгени, сюйгени шарт кёрюнеди, - деп, Борис Султанович Зумакъулланы Борисни партияны ара комитети чыгъаргъан «В ознаменование столетия образования СССР» майдалы бла саугъалагъанды.

Зумакъулланы Борис да алгъышлау сёзюнде, эм алгъа, соавтору Борис Паштовха, китапны басмалаугъа себеплик этген адамлагъа ыразылыгъын билдиргенди. «Китапда Къабарты-Малкъар Республиканы къуралыуу, аны политика системысыны Октябрь революциядан, биринчи партия организацияладан, Русаков Георгий къурагъан ячейкадан бери айныуу суратланады. Уллу Ата журт урушда хорламны коммунистле келтиргендиле, ала чапхандыла окопладан душманны ууатыргъа. Бу китапны жазыу битеу акъылымы бийлегенди. Аны сылтауу – арт кезиуде тарыхыбызны ол бетлерин унутдурургъа, совет властьны жылларында этилген ахшы ишлеге ау атаргъа, аланы терс жанындан кёргюзтюрге кюрешгенле кёп болгъанларыды. Коммунистле кёргюзтген жигитлик эсден кетерик тюйюлдю», - деп белгилегенди уполномоченный.

Авторла айтханларыча, Къабарты-Малкъарны бюгюнлюкде тохташхан къырал системасын революциягъа дери эм андан сора болум бла тюзюнлей байларгъа жарарыкъ тюйюлдю. Алай бир зат баямды: малкъар эм къабарты миллетле бусагъатдагъы кюннге жетер ючюн къыйын, кёп чурумлу жолну ётгендиле. Уллу тюрлениуле болгъандыла, алай бир зат а алгъыннгылай къалгъанды – эки миллет да бир тарых жол бла кёп жылланы барадыла. Ала Россейге башха-башха жыллада къошулгъандыла, алай эсе да, анга кертичилей къалыргъа берген антларын тутхандыла.

Республиканы партия организациясыны башчылары «алгъа журтунгу сагъышын эт» деген жорукъ бла ишлегендиле, жашагъандыла. Аланы асламысы дунияларын алышхандыла, бюгюнлюкде да сау ветеранла онгларына кёре  жамауатха хайыр келтирирге кюрешедиле. Зумакъулланы Борис да, Борис Паштов да китапда атлары айтылгъан адамланы туудукълары, учхунлары, аны окъуп, аппалары бла ёхтемленирлерине ийнаннганларын билдиредиле. «Биз бюгюн ариу Къабарты-Малкъарда мамырлыкъда, келишиулюкде жашар ючюн ала къолдан келгенни аямагъандыла.

Жангы тёлюле да ата-бабаларыбыз салгъан огъурлу тёрелени андан ары бардырырларына ышанабыз», - дейдиле ала китапны ахыр сёзюнде.
Презентацияны ахырында Борис Мустафаевич партияны районлада бёлюмлерини келечилерине китапланы саугъалагъанды, ала библиотекалагъа да юлешинирикдиле.