Ким болса да, законну эркинликлери сакъланыргъа керекдиле

 Къабарты-Малкъарны Жамауат палатасыны Совети кезиулю жыйылыуунда тюрмеледе тургъанланы эркинликлерин къоруулауда Жамауат къараучу комиссия (ОНК) къаллай иш бардыргъанын тинтгенди.

 Белгиленнген темагъа докладны комиссияны башчысы Анатолий Барсагов этгенди. Ол чертгенича, контрольну бардыргъанда эм башха  законлукъ салыннганды, ала ФСБ-ны, МВД-ны, СК-ны эм прокуратураны оператив-излеу, уголовно-процессуал жумушларына, административ бузукълукъла бла байламлы ишлерине къатышмагъандыла. Республикада УФСИН-ни уголовный жууаплылыкъгъа тартыу бла байламлы 6 казна учреждениясы барды. Андан тышында, аманлыкъчыланы болжаллы халда тутхан 4 изолятор, МВД-да 2 спецприёмник, административ арестге тюшгенлеге 53 жери бла 2 изолятор, Нальчикде бла Чегем районда стационарда психиатрия болушлукъ этген 2 медицина учреждение бардыла. 2021 жылны ахырында УФСИН-ни учрежденияларында 1767 адам тургъанды. Алада битеу да 2894 аманлыкъчыны тутаргъа жер жетерикди, бу тарихле тутмакълагъа тюшгенлени саны азайгъанын кёргюзтедиле.  

 Анатолий Барсагов билдиргенича, аманлыкъчылагъа, бузукълукъла ючюн  терсленнгенлеге медицина болушлукъ бериуде да ахшы тюрлениуле  эсленедиле. 2020 жылда туберкулездан  ауругъанланы саны азайгъанды, ол аурудан  ёлген болмагъанды. Тенглешдирип айтханда, 2019 жылда тюрмеледе 137 адамдан туберкулездан 70-си ауругъан эселе, 2021 жылда тутмакъланы саны 120 болгъанды, ауруу аладан 40-да табылгъанды.       

  ОНК къуралгъанлы биринчи кюнледен окъуна, УФСИН эм анда Жамауат совет, прокуратура, МВД, Жамауат палата бла ишчи байламлыкъла тохташдырылгъандыла, ала тюбешиулеринде тутмакъланы турмушлары, алагъа медицина болушлукъ этиу, билим бериу эм иш бла жалчытыуну амалларын сюзгендиле. Анга шагъатлыкъны УФСИН-ни башчысы Аслан Лихов да этгенди. Комиссия тамамлагъан жумушланы юслеринден управленияны сайтында дайым билдириледи. 

  Прокуратураны уголовный жууаплылыкъгъа тартыуда законлукъну сакълау жаны бла бёлюмюню башчысы Артик Кокоев  ОНК бла бирге аманлыкъчыланы терсликлерине жолукъдуруу ситеманы учрежденияларында халны тинтгенлерин, тюзетиу учреждениялада приёмла бардыргъанларын, бу мадарла болумну игилендирирге себеплик этгенлерин билдиргенди. Кесини оюмун республикада адамланы эркинлери жаны бла уполномоченный Зумакъулланы Борис билдиргенди, ол битеу сейирлери болгъан структурала биригип ишлегенлерин чертгенди.

 Докладчыла ишлерин ОНК бла байламлыкъда толтургъанларын, ол тюрмеледе тургъанланы законлу эркинликлерин сакълауда чыкъгъан проблемаланы терк тамамларгъа болушханын билдиргендиле эм мындан арысында да комиссияны жангы къаууму бла да ол халда ишлерге ышаннганларын айтхандыла, деп билдиредиле Жамауат палатаны пресс-службасындан.