Хорлагъанлагъа проектлерин тамамларгъа себеплик этилликди

 «Къонакъбайлыкъны усталары» конкурс быйыл ючюнчю кере бардырылады. Аны жангы сезону Россейде туризмни право жаны бла жалчытыугъа жораланыпды. Анга къатышыр ючюн, къыралны акъылбалыкъ болгъан гражданлары 2022 жылны 5 апрелине дери https://welcomecup.ru/  сайтда заявка къояргъа керекдиле.

Эки сезонну ичинде анга къыралыбызны жер-жерлеринден 50 мингден аслам адам къатышханды, 73 региондан 139 конкурсант проектлерин бардырыр ючюн грантла къытхандыла, алагъа федерал ведомстволаны эм бизнесни жанындан болушлукъ да этилгенди.

Быйыл конкурс 4 жаны бла къуралырыкъды: «Къонакъбайлыкъ индустрияны менеджерлери», «Туризмде  стартапла эм жангы башламчылыкъла», «Же-жерлени айнытыу», «Туризмни тамблагъы кюню». Анга къатышханла сайлагъан темаларына кёре эссе хазырларгъа, проектлерин кёргюзтюрге, туризм сферада экспертле бла ушакъла бардырыргъа керекдиле. Андан сора да, Россейде къошакъ мероприятияла ётдюрюрге белгиленеди. Бу жол тёрели жарымфиналла округ форумла халда боллукъдула, алагъа эришиуле, билим бериу программала, мастер-классла кирликдиле. Форумлагъа жангызда конкурсантла угъай, ала къуралгъан регионну турист сообществосуну хар келечиси да къатышаллыкъды.

Конкурсну юсюнден айтханда, анда кеслерин туризм эм сервис жаны бла ишлегенле, ресторан бизнесни келечилери, event-менеджерле, къонакъбайлыкъ проектлени авторлары, студентле, бу жаны бла ишлерге излеген адамла сынаргъа боллукъдула. Хорлагъанлагъа власть органланы профильли эксперт советлерине кирирге онг берилликди, билимлерин ёсдюрюрге неда проектлерин жашауда толтурургъа грантла юлешинирикдиле, стажировкаланы ётерге, иш табаргъа себеплик этилликди, деп билдиредиле республиканы Курортла эм туризм министерствосуну пресс-службасындан.