Мюлкле урлукъ бла толусунлай жалчытыныпдыла

Алгъаракълада кюнню хали тап болгъанын хайырланып, аграрийле танг жетген мирзеулюк битимлени урлукъларын себип бошагъан эдиле. Энди уа ишни тынгылы башларгъа хазырланнгандыла.

Шёндюгю болумну эмда халкъны аш-азыкъла бла тынгылы жалчытыргъа кереклисин эсге алып, республикада мирзеулюк битимлени, тахта кёгетлени эмда картофну асламыракъ жерде ёсдюрюрге умут этедиле. Регионну Эл мюлк министерствосундан билдиргенлерине кёре, урлукъладан къытлыкъ жокъду. Мюлкле картоф урлукъ бла толусунлай жалчытыныпдыла, мирзеулюк эмда къудору маталлы битимлени бла тахта кёгетлени юсюнден айтханда, аз-маз артыгъы бла окъуна къыстырыкъ этгендиле. Жаулу битимлени эмда нартюхню урлукъларындан а 22 эм 61 процентге артыгъы бла окъуна барды. Ала кеслери да кёбюсюнде бизни къыралда чыгъарылгъан тюрлюлериндендиле.

Россельхознадзорну Шимал Кавказда регионла аралы Управлениясыны специалистлери республикагъа келтирилген урлукълагъа фитосанитария жаны бла контроль этедиле. Аны КъМР-де бёлюмюню лабораториясына шёндюге дери 42 проба келгенди. Тинтиуле урлукъланы качествосу иги болгъанын, ала битеу излемлеге келишгенлерин кёргюзтгендиле.