Излеу къымылдауну айнытыуда хайырлы байламлыкъла

 «Знамя в строю» проектни чеклеринде республиканы Жамауат палатасында «Къабарты-Малкъарда излеу къымылдауну айнытыу» деген темагъа жыйылыу болгъанды. Анга Парламентни, Миллетлени ишлери эм жамауат проектле жаны бла министерствону, Жарыкъландырыу, илму эмда жаш тёлюню ишлери жаны бла министерствону, Росгвардияны управлениясыны, Следствие комитетни, аскер комиссариатны, Юнармияны келечилери къатышхандыла.  

 Быйыл Къабарты-Малкъарны 115-чи атлы  дивизиясы Ростов областьда къазауатлагъа къатышханлы 80 жыл толады. Аланы жигитликлерин белгилеу эм эсде къалдырырча ишлени бардырыр мурат бла общественникле Жамауат палатагъа координация майдан болурун тилегендиле.

Быллай жумушланы тамамлауда сынамларыны юсюнден Ростов областьны Мартыновский районуну краеведение музейини директору В.В. Карпенко, «Боевые рубежи» излеу отрядны башчысы КъМР-ни билим бериуюню сыйлы ишчиси А.Н. Мартынов билдиргендиле. Александр Николаевич айтханыча, Къоруулау министерствону эсеплерине кёре 1942 жылны жайында 1942 жылны жайында Мартыновский районну тийресинде урушда 115-чи дивизиядан 3 947 аскерчи жан бергендиле. Бюгюнлюкге аладан бир мингнге жууукъ адамны атлары тохташдырылгъандыла, солдатланы бла офицерлени 150-ден аслам сураты табылгъанды.

Александр Мартыновну оюмуна кёре, бусагъатда баш магъаналы борч жаш тёлю бла ишлеудю, 115-чи атлы  дивизияны жигитлигин жамауатха белгили этиудю эм Къорууланыу министерство бла бирге табылгъан документлени тинтиудю. «Районубузну маданият, билим бериу эмда жаш тёлю организацияланы жаны бла бёлюмю бла бирге эсде къалдырыу мероприятияланы дайым бардырабыз, ол санда автопробеглени, аскерчиле басдырылгъан жерледе патриот акцияла да. Алай бла 23 февральда дивизияны келечилерини ётгюрлюклерини юсюнден айтханбыз, Хажмудар Озовну эсгергенбиз, Уллу Мартыновкада аны атын орам жюрютеди. Московский хуторда мектепге 115-чи кавалерия дивизияны аты берилгенди. 2022 жылны июлюна дивизиягъа эм Къабарты-Малкъарны бла Ростов областьны халкъларыны шуёхлукъларына аталгъан экспозиция къураллыкъды», - дегенди ол. 

115-чи атлы  дивизиясы Ростов областьда къазауатлагъа къатышханлы 80 жыл толгъанына бизни республикада къаллай иш тамамланнганыны юсюнден а Жарыкъландырыу, илму эм жаш тёлюню ишлери бла министерствону Жаш тёлюню ишлери, сабий эм жаш тёлю организацияланы жумушлары бла кюрешген муниципал органла бла байламлыкъла жюрютюу жаны бла бёлюмню башчысы Мурат Гилиев билдиргенди. Аны докладына кёре, ёсе келген тёлюлени патриот халда юйретиуге, краеведениядан билимлерин ёсдюрюуге эс дайым бёлюнеди. Уллу Ата журт урушха аталып музейле бардыла, излеу бла бирге жарыкъландырыу иш да толтурулады. Бу датагъа жораланып, мектепледе кишиликни дерслери берилликдиле, «Хорламны волонтёрлары» къымылдау, Юнармия бла да талай мероприятие къуралырыкъды.

  Жамауат организацияла тамамларыкъ ишлени юслеринден «Кавказский рубеж» излеу отрядны соучредители Беслан Гуляжинов билдиргенди. Ол Большая Мартыновка бийикликге ёрлерге, Нальчикден Большая Мартыновкагъа автопробег этерге эм атлагъа минип барыргъа, Къабарты-Малкъарны бла Ростов областьны окъуучуларыны  араларында эришиуле къураргъа, терекле орнатыргъа эсгертиу этгенди.

  ОНФ-ни регионда бёлюмюню сопредседатели Андрей Попета уа бизни республиканы бла Чеченни парламентлерини депутатларыны болушлукълары бла кёрмюч боллугъун, анда Къоруулау министерствону архивлеринде сакъланнган сейир документле, ол санда дивизияны командири полковник Холкинни дневнигини копиясы да кёргюзтюлюрюклерин айтханды.

 Кеслерини оюмларын отставкада полковник, ветеран Хусен Мацухов, палатаны маданиятны айнытыу, тин байлыкъны сакълау эм асламлы информация органла жаны бла комиссиясыны келечиси Юлия Ордокова билдиргендиле. Юлия Валерьевна бу жумушну тийишлисича даражада бардырыр ючюн, координация советни къураргъа кереклисин да чертгенди. Миллетлени ишлери эм жамауат проектле жаны бла министр Анзор Курашинов а, регионну излеу отрядлары уллу иш тамамлагъанын белгилей, ведомство къурагъан конкурслагъа тири къатышыргъа чакъыргъанды.

 Парламентни маданият, граждан обществону айнытыу эм информация политика жаны бла комитетини башчысы Заурбек Кумаловну башламчылыгъы бла тарыхны сакълау эм айтхылыкъ адамланы атларын ёмюрлюк этиу бла байламлы Жамауат палатада ишчи къауум къуралгъанды.

 Палатаны пресс-службасындан билдиргенлерича, излеу къымылдауну айнытыу иш республикада тохтатыллыкъ тюйюлдю.